Սա ոչ միայն քաղաքական, այլեւ բարոյական խնդիր է, որի լուծմանը մենք պետք է հետեւողական լինենք, եւ, բնականաբար, չխոչընդոտենք նախաքննությանը։ Այս մասին այսօր՝ հունիսի 19-ին լրագրողների հետ զրույցում ասաց ՀՀԿ խմբակցության ղեկավար Վահրամ Բաղդասարյանը՝ պատասխանելով հարցին, թե ինչպե՞ս է խմբակցությունը քվեարկելու Մանվել Գրիգորյանին պատգամավորական անձեռնմխելիությունից զրկելու գլխավոր դատախազի միջնորդությանը։
Բաղդասարյանը նաեւ նշեց, որ պետք է հնարավորություն տան քննությանն աշխատել, իհարկե՝ չմոռանալով անմեղության կանխավարկածի մասին:
«Մենք պետք է հետեւողական լինենք, եւ եթե կան նման երեւույթներ, պետք է հետեւողական լինենք եւ օրենքի խստությամբ նման գործողություններ իրականացնողներին պատժենք։ Մենք համաձայնություն ենք տալիս, հայտարարվեց, որ Հայաստանի հանրապետական խմբակցությունը պետք է չխոչընդոտի նախաքննությանը։ Դատական պրոցեսի ընթացքում Մանվել Գրիգորյանին կտրվի հնարավորություն օգտվել անմեղության կանխավարկածից, ներկայացնել փաստեր եւ հիմնավորումներ, ինչպես որ ինքը նամակում էր գրել։ Այս ամենի գնահատականը կտան իրավապահները»,- ասաց Բաղդասարյանը։
Ընթանում է ԱԺ արտահերթ նիստը. օրակարգում Մանվել Գրիգորյանի հարցն է (ուղիղ)
