Հայաստանի Ագրարային գյուղացիական միության ղեկավար Հրաչ Բերբերյանը ահազանգում է, որ այս տարին խոնավ էր, ու անհրաժեշտ է անհապաղ սկսել զանգվածային սրսկումներ սնկային հիվանդությունների դեմ։ Հունիսի 23-ին լրագրողների հետ հանդիպման ժամանակ ՀԿ ղեկավարը նշել է, որ 2018-ին հորդառատ անձրեւների պատճառով ախտածին սնկերը սպառնում են բերքին հսկայական կորուստ պատճառել։
«Գյուղատնտեսական սուբյեկտները պետք է հենց այսօրվանից սկսեն սրսկումներ սնկային պաթոգենների դեմ, հակառակ դեպքում կորուստներից խուսափել հնարավոր չէ։ Արդեն հիմա հիվանդությունը գրոհել է հացահատիկի ու կարտոֆիլի ցանքերի վրա Շիրակի մարզում, կարող է տարածվել նաեւ խաղողի վրա, ու եթե գյուղացիները ժամանակին այդ միջոցառումները չձեռնարկեն, բերքի կորուստն անխուսափելի կլինի»,- շեշտել է Բերբերյանը։
