Ռուսաստանը պատրաստ է հայ-ռուսական ներդրումային հիմնադրամ ստեղծել: Այս մասին հունիսի 29-ին Երեւանում ընթացող Հայ-ռուսական միջտարածաշրջանային 7-րդ ֆորումի ժամանակ լրագրողների հետ զրույցում ասաց ՌԴ մշակույթի նախարար Վլադիմիր Մեդինսկին:
Նրա խոսքով՝ այնուհետեւ այս հարցը պետք է քննարկվի արդեն այլ մակարդակով: «Այսօրվա այցին նախապատրաստվելիս ես տեղեկացա պատրաստակամության հետ կապված մեր դիրքորոշման մասին: Հիմնադրամը համատեղ նախագծերում միշտ արագ ներդրումներ կատարելու գործիք է: Պետք չէ ամեն անգամ պայմանավորվել ֆինանսավորման աղբյուրների վերաբերյալ, դրանք արդեն կան: Խոսվում է միայն այն մասին՝ ձեռնտու է, թե ոչ»,- ասաց նախարարը:
Ուստի, հավելեց նա, պրակտիկան ցույց է տալիս, որ այլ գործընկեր երկրների հետ համատեղ այդ հիմնադրամների գոյությունը կտրուկ արագացնում է համագործակցության գործընթացը, ինչը շատ ձեռնտու է բիզնեսի համար»,- ասաց Մեդինսկին:
Անդրադառնալով Հայաստանի հետ հարաբերություններին՝ նա նշեց, որ Ռուսաստանը մշտական, հուսալի գործընկեր եւ դաշնակից է: «Հայաստանն այն երկիրն է, որի հետ տնտեսական կապերը հիմնվում են դարավոր դաշինքի եւ վստահության վրա, եւ դրանք դժվար է չափել տնտեսական շրջանառության չափերով կամ ֆորմալ թվերով: Այն փաստը, որ այս շրջանառությունը տարեցտարի աճում է, հենց տնտեսական եւ հումանիտար համագործակցության արդյունավետ կերպով ստեղծված մոդելի անմիջական արդյունքն է», - եզրափակեց Վլադիմիր Մեդինսկին
Հիշեցնենք, որ հունիսի 29-ին Երեւանում մեկնարկել է Հայ-ռուսական միջտարածաշրջանային 7-րդ ֆորումը, որն անցկացվում է «Ռուսաստանի եւ Հայաստանի թվային նախաձեռնությունները՝ ԵԱՏՄ-ի թվային օրակարգի իրականացման շրջանակներում» կարգախոսի ներքո:
