Միացյալ Նահանգների նախագահ Դոնալդ Թրամփը ՆԱՏՕ–ի անդամ երկրների առաջնորդներին նամակներ է հղել, որում հիասթափություն է հայտնել, որ Դաշինքի մի քանի անդամներ չեն ավելացրել պաշտպանության ծախսերը, գրում է The New York Times–ը։ Պարբերականի տվյալներով, նամակն ուղարկվել է նախորդ ամիս, հասցեատերերի թվում են Գերմանիայի, Բելգիայի, Նորվեգիայի, Կանադայի առաջնորդները:
«Ինչպես մենք արդեն քննարկել ենք ապրիլին ձեր այցի ժամանակ, ԱՄՆ–ում աճում է հիասթափությունը այն բանի պատճառով, որ մի քանի դաշնակիցներ չեն ավելացրել [պաշտպանության ծախսերը], ինչպես խոստացել էին»,–գրել է նա Գերմանիայի կանցլեր Անգելա Մերկելին։
Նամակում Թրամփը նշել է, որ անբավարար պաշտպանական բյուջեն բացասաբար է ազդում ՆԱՏՕ–ի անվտանգության վրա, ինչպես նաեւ դրդում է Դաշինքի դաշնակիցներին չկատարել պաշտպանության ծախսերի ավելացման խոստումը՝ մերժող երկրների օրինակին հետեւելով։
Պարբերականը նաեւ նշել է, որ նման ձեւակերպումներ Թրամփն ընտրել է նաեւ ՆԱՏՕ–ի մյուս անդամ երկրների առաջնորդներին ուղղված նամակներում։
