Եվրոպական խորհրդարանի պատգամավորները մերժել են համացանցում հեղինակային իրավունքի վերաբերյալ վիճելի հրահանգը: Օրինագծին դեմ քվեարկել է 318 խորհրդարանական, 278-ը կողմ է հանդես եկել: Հրահանգի նոր քննարկումը կարող է տեղի ունենա սեպտեմբերին, փոխանցում է DW-ն:
Օրինագծի մի շարք դրույթներ քննադատության են արժանացել մասնագետների կողմից: Մասնագիտացած TechCrunch պարբերականի փոխանցմամբ՝ հատկապես խնդրահարույց են հրահանգի 11-րդ եւ 13-րդ հոդվածները: Առաջին լրատվական կայքերին պարտավորեցնում է «հղումների համար հարկեր» սահմանել, այսինքն՝ վճարել լրագրողական նյութերից հատվածներ վերցնելու համար: Երկրորդ հոդվածը կայքերի համար պատասխանատվություն է ենթադրում՝ իրենց օգտվողների կողմից հեղինակային իրավունքների խախտման համար:
Փորձագետների կարծիքով՝ դա անխուսափելիորեն ստիպում է կայքերին ողջ բովանդակության նախնական զտում կատարել: Քննադատների կարծիքով՝ յուրաքանչյուր հրապարակմա՝ հեղինակային իրավունքին համապատասխանությունը ստուգել ֆիզիկապես անհնար է, իսկ ստուգման ավտոմատացված համակարգի ներդրումը երկարատեւ եւ թանկ գործընթաց է, հատկապես այն պատճառով, որ նման համակարգերը սխալներից ապահովագրված չեն:
Որպես հրահանգի հնարավոր ընդունման դեմ բողոքի նշան՝ Wikipedia պորտալը նախօրեին դադարեցրել էր աշխատանքն առնվազն չորս եվրոպական լեզվով: Օգտվողների համար անհասանելի էին պորտալի իտալերեն, իսպաներեն, լատվերեն եւ լեհերեն տարբերակները:
