ՀՀ վարչապետ Նիկոլ Փաշինյանը Արենիում բնակիչների հետ հանդիպման ժամանակ անդրադարձել է հաջորդ շաբաթ ՆԱՏՕ–ի շրջանակներում կայանալիք հանդիպման ժամանակ Երեւանի օրակարգին։
«ՆԱՏՕ–ի շրջանակներում հանդիպումը նվիրված է լինելու խաղաղապահ առաքելություններին, իսկ ԵՄ շրջանակներում օրակարգը երկկողմ հարաբերությունների խնդիրն է, կնքած պայմանագրերի իրագործումն ու հետագա համագործակցությունը»,-այսօր՝ հուլիսի 6-ին, Արենիում լրագրողների հարցերին ի պատասխան ասաց Փաշինյանը:
Հարցին, արդյոք վերջնական հստակեցվել է նրա մասնակցության հարցը ՆԱՏՕ–ի գագաթնաժողովին, վարչապետը պատասխանեց, որ ՆԱՏՕ-ի գագաթնաժողովին կմասնակցի, եթե արտառոց բան չպատահի. «Արտառոց բանը կարող է կապ ունենալ միայն գագաթնաժողովի վերջնական տեքստի հետ։ Եթե տեքստում մեզ համար անընդունելի բաներ չլինեն, ես, իհարկե, կմասնակցեմ»։
Նա հույս հայտնեց, որ տեքստում բոլոր ձեւակերպումները կլինեն հավասարակշռված եւ բոլորի շահերը հաշվի կառնվեն։
Հիշեցնենք, որ հուլիսի 11-12-ը Բրյուսելում կկայանա ՆԱՏՕ–ի գագաթնաժողովը։ ՆԱՏՕ–ի գագաթաժողովներին զուգահեռ անցկացվում է Աֆղանստանում «Վճռական աջակցություն» առաքելության մասնակից երկրների ղեկավարների հանդիպումը, որին այս տարի Հայաստանից կմասնակցի վարչապետ Նիկոլ Փաշինյանը։
