Չորեքշաբթի առավոտյան «Մարիա» սուպերթայֆունը պատուհասել է Չինաստանի արեւելյան ափերի Ֆունցզյան եւ Չժեցզյան նահանգները՝ իր հետ բերելով տեղատարափ անձրեւներ, ուժգին քամիներ, բարձր ալիքներ եւ մասնակի ջրածածկումներ, տարհանվել է ավելի քան 144 հազար մարդ, փոխանցում է «ՌԻԱ Նովոստի»-ն՝ վկայակոչելով Չինաստանի Կենտրոնական հեռուստատեսությանը:
Թայֆունն ափի վրա է փլուզվել տեղական ժամանակով 9.10-ին: Չինաստանի օդերեւութաբանական վարչությունը պահպանում է նախօրեին մտցրած նախազգուշական բարձրագույն «կարմիր մակարդակը» այն շրջանների համար, որոնք հայտնվել են «Մարիայի» ազդեցության գոտում: Չժեցզյան նահանգի 5 քաղաքների իշխանությունները ստիպված էին անվտանգ վայրեր տարհանել 144 հազարից ավելի բնակիչների, նավահանգիստներ են վերադարձել ավելի քան 20 հազար ձկնորսական նավեր եւ գրեթե 5 հազար այլ տեսակի նավեր: Փակվել են տուրիստական օբյեկտները, առափնյա բնակիչներին հրահանգվել է առանց ծայրահեղ անհրաժեշտության տներից դուրս չգալ:
Թայֆունի ազդեցությունը զգացվում է նաեւ Թայվանում: Այստեղ փակվել են դպրոցները, մանկապարտեզները, մի շարք քաղաքներում չեն աշխատում պետական հաստատությունները: Եղանակային վատ պայմանների հետեւանքով խափանվել է Թայվանի ավիահաղորդակցությունը, Թեյբեյի օդանավակայանում չեղարկվել են հարյուրավոր չվերթներ:
Նույնպիսի վիճակ է ստեղծվել նաեւ Ֆունցզյան նահանգի Ֆուչժոու քաղաքի օդանավակայանում, այստեղ նույնպես փակվել են ուսումնական հաստատություններն ու ֆաբրիկաները, իշխանությունները կարգադրել են բոլոր ձկնորսական նավերին ափ վերադառնալ եւ ծով դուրս չգալ մինչեւ եղանակի լավացումը: Ֆունցզյան նահանգում մի շարք ենթակառուցվածքային օբյեկտների, օրինակ՝ նավահանգիստների եւ արագընթաց երկաթուղու գծերի շինարարությունը դադարեցվել է: «Սինհուայի» տեղեկություններով՝ Fujian Expressway Group ընկերության գրեթե 1500 աշխատողներ պատրաստ են ցանկացած պահի սկսել վերականգնողական աշխատանքները, եթե վնասվեն երկաթուղային պաստառները:
Օդերեւութաբանների կանխատեսմամբ՝ «Մարիա» թայֆունը չորեքշաբթի աստիճանաբար կթուլանա՝ մայրցամաքի խորքեր հյուսիարեւմտյան ուղղությամբ շարժվելուն զուգահեռ:
