Հաշվի առնելով երկրում ստեղծված նոր իրողությունը, Երևանի ավագանու «Հանրապետական կուսակցություն» խմբակցությունը հուլիսի 16-ին կայանալիք Երևանի քաղաքապետի ընտրություններին չի առաջադրելու թեկնածու և չի մասնակցելու Երևանի ավագանու համապատասխան նիստին։
Այս մասին ասվում է Երևանի ավագանու «Հանրապետական կուսակցություն» խմբակցության տարածած հայտարարության մեջ։
«Խորապես համոզված ենք, որ, ստեղծված իրավիճակում Երևան քաղաքի հետագա բնականոն և շարունակական զարգացումը ապահովելու նպատակով, նոր քաղաքապետին և ավագանու անդամներին պետք է ընտրեն մայրաքաղաքի բնակիչները»,- ասվում է հաղորդագրությունում։
Ավելի վաղ «Ելք» խմբակցությունը նույնպես հայտարարություն էր տարածել, որ հուլիսի 16-ին կայանալիք քաղաքապետի ընտրություններում թեկնածու չի առաջադրելու եւ չի մասնակցելու ավագանու արտահերթ նիստին:
Հիշեցնենք, որ Երեւանի ավագանին հուլիսի 16-ին պետք է քաղաքապետ ընտրի։
Փաստորեն, միայն «Երկիր ծիրանի» խմբակցությունն է պաշտոնապես հայտարարել, որ առաջադրելու է խմբակցության ղեկավար Զարուհի Փոստանջյանի թեկնածությունը եւ մասնակցելու է ավագանու նիստին։