Քննարկումներն ընթացքի մեջ են, եւ այսօր ես շտապում եմ նաեւ այդ հանդիպմանը՝ նախարարների մակարդակով, որ գտնենք ընդհանուր լուծումներ: Այս մասին, այսօր՝ հուլիսի 18-ին, լրագրողների հետ զրույցում նշել է ՀՀ աշխատանքի եւ սոցիալական հարցերի նախարար Մանե Թանդիլյանը՝ անդրադառնալով կուտակային կենսաթոշակային համակարգի խնդրին:
«Լուծումները կան, տրված են, մնում է որոշակի համաձայնության գալ, եւ վերջնական տեսքով նախագիծը դնենք հանրային քննարկման»,-ասաց նա:
Հարցին, թե որոնք էին այն սկզբունքները, որի համար նաեւ հրաժարական տվեցիք, նա արձագանքեց. «Ես սկզբունքները հայտարարել եմ, բացահայտել եմ, եւ հենց այդ մասին են լուծումները, որոնք կհրապարակենք, երբ հանրային քննարկումներն ամփոփենք եւ նախագծին կտրվի օրենքի տեսք»:
Ինչ վերաբերում է Դաշնակցության ներկայացրած առաջարկներին, Մանե Թանդիլյանն ասաց, որ վաղուց է ծանոթ այդ տեսակետին. «Ես այդ հայեցակարգով աշխատել եմ Արծվիկ Մինասյանի հետ, եւ հիմա գտնում ենք ընդհանուր հնարավոր լուծումներ»:
