Պաշտպանության նախարարության զորամասերից մեկում ժամկետային զինծառայող է զոհվել: Շարքային Ժորա Պետրոսյանը մահացու հրազենային վիրավորում է ստացել դեմքի շրջանում: Քրեական գործ է հարուցվել, երիտասարդի մահվան հանգամանքները պարզելու համար արդեն քննություն է տարվում: Քննչական կոմիտեի նախնական տվյալներով՝ Պետրոսյանը զոհվել է ծառայակցի կողմից զենքի հետ վարվելու կանոնները խախտելու հետեւանքով:
Արցախա-ադրբեջանական շփման գծում իրավիճակն Արցախի պաշտպանության նախարարը հանգիստ է գնահատում: Ստեփանակերտում լրագրողների հետ հանդիպմանն ամփոփելով այս տարվա առաջին կիսամյակը՝ Լեւոն Մնացականյանն ասել է, որ հրադադարի ռեժիմի խախտման դեպքերը կտրուկ նվազել են, բայց նաեւ չի բացառել իրադրության սրման հավանականությունը: Փոխարենն ադրբեջանցիներն ակտիվացրել են հետախուզական գործողությունները, հատկապես՝ անօդաչուների կիրառմամբ, զորավարժություններ են անցկացրել, ռազմական շքերթ Բաքվում. հայկական կողմը հետեւել է այս ամենին եւ վերահսկել: Անդրադառնալով ադրբեջանական բանակի սպառազինության համալրման մասին հարցին՝ Լեւոն Մնացականյանը վստահեցրել է, որ Պաշտպանության բանակն ապահովված է դրանց համարժեք բոլոր զինատեսակներով:
Նիկոլ Փաշինյանի եւ Դավիթ Տոնոյանի որդիները, ինչպես հայտնի է, ծառայության են մեկնել Արցախ: Լեւոն Մնացականյանն ասում է՝ պատրաստված տղաներ են, ծառայում են պատասխանատվության բարձր գիտակցությամբ:
Ինչ վերաբերում է Մանվել Գրիգորյանի տանն ու ամառանոցում խուզարկության ընթացքում հայտնաբերված մեքենաներին. Արցախի պաշտպանության նախարարն ասել է՝ դրանք նվիրաբերվել են ԵԿՄ-ին: Իսկ պաշտպանության բանակին ուղարկված բոլոր մեքենաները, Մնացականյանի հավաստմամբ, իրենց հաշվեկշռում են:
Գեներալ Մանվել Գրիգորյանը զրկվեց Էջմիածնի պատվավոր քաղաքացու կոչումից: Որոշումն այսօր կայացրել է Էջմիածնի քաղաքապետարանի ավագանին: Քաղաքապետի ժամանակավոր պաշտոնակատար Դիանա Գասպարյանն ասել է, որ Facebook-ում հարցման միջոցով փորձել են պարզել էջմիածինցիների կարծիքը, սակայն դժվար է եղել հասկանալ, թե հարցման մասնակիցների ո՞ր հատվածն է Էջմիածնից: Մասնագիտությամբ իրավաբան Գասպարյանը շեշտել է, որ թե՛ պատվավոր քաղաքացու կոչում շնորհելը, թե՛ դրանից զրկելն իրավական հետեւանքներ չի ենթադրում: Մանվել Գրիգորյանը, հիշեցնենք, կալանավորված է: ԱԱԾ-ն նրա տանն ու ամառանոցում խուզարկության արդյունքում մեծ քանակությամբ զենք ու զինամթերք, թանկարժեք մեքենաներ, ապրիլյան քառօրյայի մասնակիցներին ուղարկված սնունդ եւ շտապօգնության մեքենա էր հայտնաբերել:
Վաչագան Ղազարյանի խափանման միջոցը փոխելու համար սահմանված 1 մլրդ դրամը վճարվել է. նա ազատ է արձակվել կալանքից: Սերժ Սարգսյանի թիկնազորի նախկին պետի գործով գրավի գումարը սահմանել էր Վերաքննիչ դատարանը: Փաստաբանն ասում է՝ Վաչագան Ղազարյանը դեռ գործով ցուցմունք չի տվել, միայն որոշ բացատրություններ է տվել. նա չի ընդունում իրեն առաջադրված մեղադրանքը: Հիշեցնենք, որ Ղազարյանը մեղադրվում է ապօրինի հարստացման եւ բարձրաստիճան պաշտոնատար անձանց էթիկայի հանձնաժողով ներկայացրած հայտարարագրերում ունեցած դրամական միջոցների իրական չափը թաքցնելու մեջ: Ձերբակալման պահին նրա մոտ, հետագայում՝ նաեւ տանն ու ավտոտնակում խուզարկությունների ժամանակ մեծ քանակությամբ գումար է հայտաբերվել եւ առգրավվել:
Երեւանում դատավորի տուն են թալանել: Անհայտ անձը կամ անձինք 37-ամյա Սերգեյ Մարաբյանի բնակարանից ոսկյա եւ արծաթյա զարդեր են գողացել: Նախնական տեղեկություններով՝ գողոնը մի քանի միլիոն դրամի է հասնում: Մարաբյանը Վերաքննիչ քրեական դատարանի դատավոր է: Փաստի առիթով քրեական գործ է հարուցվել:
Հունաստանում անտառային հրդեհներ են մոլեգնում. դրանք արդեն բնակելի թաղամասերի են հասել: Հրդեհների հետեւանքով զոհերի թիվը հասել է 74-ի, շուրջ 160 մարդ տուժել է: Տեղական լրատվամիջոցների փոխանցմամբ՝ զոհվածների թվում շատ երեխաներ կան: Մայրաքաղաք Աթենքի մերձակա Ատիկեում արտակարգ դրություն է հայտարարվել։ Նշենք, որ Հունաստանում անոմալ շոգ եղանակ է, որոշ շրջաններում օդի ջերմաստիճանը հասնում է +40 աստիճանի:
Հունաստանում Հայաստանի դեսպանատանը թեժ գիծ է գործում՝ հրդեհներից տուժած Հայաստանի քաղաքացիներին օգնելու նպատակով: Դեսպանատնից, միաժամանակ, հայտնել են, որ տուժածների թվում հայաստանցիներ չկան:
Երեկվա արժեւորումից հետո դոլարն ու եվրոն այսօր աննշան էժանացել են: Հուլիսի 24-ին դոլարի փոխարժեքը կազմել է 481 դրամ, եվրոյինը՝ 562, ռուբլունը՝ 7 դրամ 66 լումա, ֆունտինը՝ 630 դրամ:
Հուլիսի 25-28-ը հանրապետությունում սպասվում է առանց տեղումների եղանակ: Օդի ջերմաստիճանը 5-6 աստիճանով կբարձրանա: Երեւանում նույնպես վաղը տեղումներ չեն սպասվում: Մայրաքաղաքում գիշերը կդիտվի +19+21, ցերեկը՝ +37+39 աստիճան տաքություն:
