Գնաճը ողջամիտ շրջանակներում է։ Այս մասին այսօր՝ օգոստոսի 8-ին, լրագրողների հետ հանդիպմանն ասաց ՀՀ Կենտրոնական բանկի նախկին նախագահ, տնտեսագետ Բագրատ Ասատրյանը։
«Գնաճը միշտ անհանգստացնող երեւույթ պետք է դիտարկվի, հատկապես լայն հանրության շահերի տեսանկյունից։ Սակայն ամեն ինչ ծրագրի շրջանակներում է, արտառոց ոչինչ տեղի չի ունեցել։ Առաջին 7 ամիսների ցուցանիշներով՝ գնաճը խելամիտ շրջանակներում է։ Այս խնդրի շրջանակներում պատկան մարմինները եւ ԿԲ–ն բավականին արդյունավետ են իրականացնում»,– նշեց նա։
Տնտեսագետը մեծ խնդիր է համարում այն հանգամանքը, որ գյուղատնտեսությունը որեւէ կերպ չի հարկվում։ «Մենք ամբողջ գյուղատնտեսությունը կարող ենք ստվեր համարել, մենք ակամայից գիտակցելով, որ այո, գների բարձրացման կարող է բերել, այնուամենայնիվ, պետք է բերենք հարկային դաշտ»։
ՀՀ վարչապետի խորհրդական Մեսրոպ Առաքելյանը էլ նշեց, որ գնաճի մակարդակը անհանգստության պատճառ չունի։
«Որոշ գյուղատնտեսական ապրանքների գները, որոնք ամենաճկունն են, անընդհատ փոփոխության են ենթարկվում՝ կախված սեզոնայնությունից, բնակլիմայական պայմաններից, կարող են էական թվալ, սակայն ընդհանուր գնաճի վրա դրանց ազդեցությունը շատ փոքր է։ Արհեստական գների բարձրացում գերշահույթի հաշվին այլեւս չկա»,– նկատեց նա։
Խորհրդականը կրկնեց՝ հարկ վճարելը ՀՀ–ում այլեւս այլընտրանք չունի. «Իհարկե հարկ չվճարելու հաշվին կարելի է ապրանքների գները նվազեցնել, սակայն դա քննարկման առարկա չի կարող դառնալ։ Հնարավոր է հարկային որոշակի փոփոխությունների արդյունքում տնտեսվարողների գործունեության մեջ որոշակի փոփոխություն նկատվի, սակայն երկարաժամկետ հատվածում հարկային արդարություն կհաստատվի, իսկ հարկային օրենսդրության փոփոխությամբ այն խնդիրները, որոնք բողոքի տեղիք են տալիս տնտեսվարողների մոտ, այլեւս չեն լինի, հատկապես փոքր բիզնեսի համար կհաստատվի հարկային արդարություն։ Մի քանի հարկատեսակներով հարկային բեռի փոփոխությունը էական կլինի»: