Չինաստանի համացանցային խոշորագույն Alibaba Group ընկերությանը պատկանող Taobao էլեկտրոնային առեւտրի հարթակը եւ Microsoft-ը համատեղ «խելացի ակնոց» են մշակում, որի օգնությամբ խանութում ապրանքի մասին տեղեկությունը հնարավոր է ստուգել ուղղակի դրա վրա նայելով, հայտնում է «Սինհուա» գործակալությունը:
Ակնոցը ստացել է «Taobao MR Buy» անվանումը: Այն կարող է որոշել ապրանքը եւ խառը իրականության տեխնոլոգիայի միջոցով դրա մասին տարբեր տեղեկություններ ցույց տալ, ինչպիսին են՝ գինը, գնորդների արձագանքները, գնումների եւ տեղ հասցնելու տարբերակները: Այս ամենը տեսնելուն կօգնի Microsoft HoloLens-ի խառը իրականության ակնոցը:
«Դրանից բացի, այս ակնոցի օգնությամբ օգտատերը կարող է ապրանքներ գտնել Taobao հարթակում եւ դրանց հոլոգրամները տեսնել իրական աշխարհում,- ասել է Taobao-ի ներկայացուցիչ Չժեն Չժունը: - Ապագայում նման գաջեթների համար մեր հարթակում հասանելի կլինի ապրանքների մեծ տեսականի, իսկ օգտատերերը կկարողանան ինտերֆեյսը կառավարել աչքերի եւ ձեռքերի շարժումներով»:
Taobao-ն ակնոցը հրապարակային թեստավորման կներկայացնի այս տարվա սեպտեմբերին:
Alibaba Group-ը 1999 թվականին հիմնադրել է Ջեք Ման եւ էլեկտրոնային կոմերցիայի ոլորտում համարվում է Չինաստանի խոշորագույն համացանցային ընկերությունը: Խմբին են պատկանում մի քանի դուստր ընկերություններ եւ համացանցային հարթակներ, որոնց թվում են Tmall.com եւ AliExpress էլեկտրոնային վաճառքի խանութները: