Բոլոր քայլերը պետք է չափազանց զուսպ, հավասարակշռված եւ օրենքի շրջանակներում լինեն: Այս մասին օգոստոսի 14-ին լրագրողների հետ հանդիպման ժամանակ հայտարարեց «Ընդդեմ իրավական կամայականության» հասարակական կազմակերպության գործադիր տնօրեն, ՀՀ առաջին օմբուդսմեն Լարիսա Ալավերդյանը՝ մեկնաբանելով ՀՀ երկրորդ նախագահ Ռոբերտ Քոչարյանի կալանավորումն եւ հետագա ազատումը:
Ընդ որում, նա նշեց, որ Ռոբերտ Քոչարյանի ձերբակալման հարցում շտապողականություն է դրսեւորվել: «Իրավական գործընթացները պետք է ոսկերչական ճշգրտությամբ իրականացվեն»,- պարզաբանեց Ալավերդյանը:
Նա նաեւ հիշեցրեց, որ Ռոբերտ Քոչարյանի նախագահության ժամանակ քաղաքական հետապնդման է ենթարկվել, իսկ 2008 թվականին Հայաստանի Ազգային ժողովում նա առաջիններից էր, ով հայտարարեց, որ Մարտի 1-ի դեպքերի պատասխանատվությունը ամբողջությամբ երկրորդ նախագահ Ռոբերտ Քոչարյանի վրա է: Սակայն Ալավերդյանը շեշտեց, որ պատասխանատվությունն ու մեղքը տարբեր հասկացություններ են:
Իրավապաշտպանը նաեւ նշեց, որ շտապողականությունն այս գործում կարող է խանգարել Հայաստանի նոր կառավարությանը:
Ընդ որում, Ալավերդյանը համոզված է, որ Ռոբերտ Քոչարյանի նկատմամբ այլ հոդվածով պետք է գործ հարուցվեր՝ ապօրինի հարստացում, այլ ոչ թե՝ սահմանադրական կարգի տապալում:
Հիշեցնենք, որ Վերաքննիչ դատարանն օգոստոսի 13-ին կայացած նիստում չեղարկեց առաջին ատյանի դատարանի՝ նախկին նախագահի անձեռնմխելիության հետ կապված որոշումը: Հայաստանի Հատուկ քննչական ծառայությունը Վերաքննիչ դատարանի գործողությունները «անօրինական» է անվանել: Երկրորդ նախագահ Ռոբերտ Քոչարյանին ազատման որոշման մասին հայտարարության մեջ ՀՔԾ-ն պնդում է, որ Վերաքննիչ դատարանը դուրս է եկել իր լիազորությունների շրջանակից: «Հուսով ենք, որ Գլխավոր դատախազությունը վճռաբեկ բողոք կներկայացնի»,- նշվում է հայտարարության մեջ:
Ռոբերտ Քոչարյանին մեղադրանք է ներկայացվել 2008 թվականի մարտի 1-ին Երեւանում տեղի ունեցած դեպքերի կապակցությամբ: