Հայաստանի տարբեր շրջաններում տեղացած առատ ձյունը սպասված էր մի շարք պատճառներով. դեկտեմբերն ու հունվարը արտասովոր չորային էին, ինչը նպաստավոր չէ գյուղատնտեսության համար։ Չորային եղանակը նպաստում է նաեւ կրծողների եւ հիվանդությունների տարածմանը։

Սակայն տեղացած առատ ձյունն իսկական պատուհաս է դարձել ապահովագրական ընկերությունների համար, քանի որ ճանապարհա-տրանսպորտային պատահարների թիվը կտրուկ ավելացել է։

Մեր հարցումների համաձայն՝ փետրվարի 1-ին 8 ապահովագրական ընկերություններ ճանապարհային պատահարների վերաբերյալ ստացել են մոտ 700 ահազանգ: Սա մոտ 5 անգամ ավելի շատ է, քան «սովորական» օրերին։ Առայժմ վնասների վերաբերյալ գնահատականներ չկան, սակայն, ըստ նախնական գնահատականների՝ ապահովագրական ընկերությունները ստիպված կլինեն առնվազն 70 մլն դրամի փոխհատուցում տրամադրել։