Ոստիկանությունը հանրապետության ողջ տարածքում շարունակում է «Կանեփ-կակաչ-2018» համալիր օպերատիվ-կանխարգելիչ միջոցառումը, որի շրջանակներում իրավապահներն օրերս Գյումրիում թմրանյութ պահելու, պատրաստելու եւ օգտագործելու հերթական դեպքը գրանցեցին:
Ոստիկանության լրատվական ծառայությունից հայտնում են, որ օգոստոսի 15-ին տեղեկություններ էին ստացել, որ Գյումրիի Հնոցավան փողոցի տներից մեկում թմրամիջոց են պահում, պատրաստում եւ օգտագործում: Նույն օրը, իրեղեն ապացույցներ ձեռք բերելուց հետո, քրեական հետախույզները հիշյալ տան բնակիչ, նախկինում տարբեր հանցագործությունների համար դատապարտված Սերգեյ Խաչատրյանին, ընկերոջ` Արմեն Այվազյանի հետ, բերման ենթարկեցին ոստիկանության Կումայրիի բաժին:
Զննությամբ Խաչատրյանի տան բակից հայտնաբերվել է կանեփի 10-ը ցողուն, տնից` պոլիէթիլենային տոպրակով մուգ կանաչավուն կիսաչոր եւ չորացված, յուրահատուկ հոտով կանեփանման զանգվածներ, յուրահատուկ հոտ ունեցող հեղուկով ապակյա շիշ, պլաստմասե շշից պատրաստված ծխելու հարմարանք, պատերին ու հատակին շագանակագույն նստվածքով տարբեր տարաներ, օգտագործված ու չօգտագործված ներարկիչներ, որոնցից մեկում դեղանականաչավուն յուհատուկ հոտով հեղուկ կար:
Խաչատրյանը հայտնել է, որ դրանք իրենն են, հիշյալ տարաներով կանեփի տերեւներից ու գլխիկներից թմրամիջոց է պատրաստում եւ օգտագործում:
Նշվածից բացի, Արմեն Այվազյանի անձնական խուզարկությամբ, հայտնաբերվել է կոտրված ապակե սրվակ` մարիխուանա թմրամիջոցի նմանվող զանգվածով;
Ըստ Այվազյանի, մարիխունան իրենց թաղում անձամբ է քաղել, չորացրել ծխելու համար:
Հայտնաբերվածներն առգրավվել են:
Նշանակվել է փորձաքննություն:
Փաստի առթիվ ոստիկանության Կումայրիի բաժնում նախապատրաստվում են նյութեր:
