Այսօր «Զվարթնոց» միջազգային օդանավակայանում կնքվեց պայմանագիր «Ազիմուտ» ավիաընկերության եւ «Արմենիա Միջազգային Օդանավակայաններ» ՓԲԸ միջեւ:
«Արմենիա Միջազգային Օդանավակայաններ» ՓԲԸ-ից NEWS.am-ին հայտնում են, որ ըստ պայմանագրի, 2018թ հոկտեմբերի 1-ից «Ազիմուտը» Երեւանից կսկսի թռիչքներ իրականացնել Ռոստով, Կրասնոդար եւ Ստավրոպոլ ուղղություններով:
Հանդիպմանը ներկա էին «Ազիմուտ» ավիաընկերության տնօրենների խորհրդի նախագահ Պավել Ոդոդը, գլխավոր տնօրեն Պավել Եկժանովը, գործադիր տնօրեն Էդուարդ Տեպլիցկին, Ռոսավիացիայի Հարավ մասնաճյուղի պետ Վլադիմիր Իսաեւը: Հայկական կողմից հանդիպմանը մասնակցում էին «Արմենիա Միջազգային Օդանավակայաններ» ՓԲԸ գլխավոր մենեջեր Մարսելո Վենդեն եւ գլխավոր մենեջերի տեղակալ Սերգեյ Ավետիսյանը: