Սոչիում ավիապատահարի հետեւանքով տուժածների թվում հայեր եւ Հայաստանի քաղաքացիներ չկան: Այս մասին NEWS.am-ին հայտնեցին Հայաստանի ԱԳՆ մամուլի ծառայությունից:
Ինչպես ավելի վաղ հայտնել էինք, «Սոչի» օդանավակայանում Utair ավիաընկերության «Բոինգ 738» օդանավը վայրէջքի ժամանակ, որն իրականացնում էր «Վնուկովո-Սոչի» UT579 չվերթը, թռիչքուղու սահմաններից դուրս է եկել, սահել գետի հունի մեջ եւ բռնկվել: Պատահարի հետեւանքով տուժել է 18 մարդ:
Օդանավակայանի աշխատակիցը, որն օգնում էր չարաբաստիկ չվերթի ուղեւորների տարհանմանը, մահացել է սրտի կաթվածից: «Սրտի կաթվածից մահացել է «Սոչի» օդանավակայանի համալիր հերթափոխի ղեկավար Վլադիմիր Բեղիյանը, որն առաջինն է ժամանել ողբերգության վայր եւ տարհանման ժամանակ օգնել»,- փոխանցում է Vesti-ն:
ԱԳՆ-ից հայտնել են, որ մահացածը Ռուսաստանի քաղաքացի է, ազգությամբ հայ:
