Չի կարող այնպես լինել, որ պետությունից գողանան 20 մլն դրամ եւ մենք վերադարձնենք 20 մլն դրամ. պետությունը նրանց զրո տոկոսով վարկ չէր տվել, որ հետո բերեն մարեն: Այս մասին, այսօր՝ սեպտեմբերի 5-ին, իր պաշտոնավարման 100 օրն ամփոփող ասուլիսի ժամանակ նշեց ՀՀ պետական վերահսկողության ծառայության ղեկավար Դավիթ Սանասարյանը:

«Ես կարող եմ նախնական ասել, որ բոլոր ուսումնասիրություններով, որոնք մենք իրականացնում ենք, վերադարձվող գումարը մի քանի անգամ գերազանցում է այն գումարը, որն իրենք գողացել են: Տարբեր հաշվարկներ են արվել, գնահատականներ են տրվել, եւ նրանք այդ գնահատականներին չեն առարկել»,-ասաց Սանասարյանը:

«Ես միշտ պատկերացրել եմ, թե ինչպես են երկրի միջոցները կերել,  բայց ես ամեն օր ստանում եմ բացասական էմոցիաներ, ու իմ տպավորությունն է, որ մարդիկ պատկերացրել են, որ խոպան են եկել եւ ուզում էին հարստանալ եւ շատերը հարստացել են: Մեր նպատակը չի, որ նախկին կոռուպցիոներները լցվեն բանտերը եւ եթե պետությանը հասցված վնասը կփոխհատուցեն, նրանց ներում կշնորհեն»,-ասաց նա:

Ավելի վաղ NEWS.am-ը հայտնել էր, որ այս ընթացքում Պետական վերահսկողության ծառայությունն ուսումնասիրություն է կատարել 6 ընկերությունում: Մասնավորապես, ուսումնասիրություններ են իրականացվել «Բարձրավոլտ էլեկտրացանցեր» ընկերությունում, ոստիկանության ենթակայության տակ գործող «Լուսանշան» ՊՈԱԿ-ում, «Հայրենիք-Սփյուռք» ՊՈԱԿ-ում, Հայաստանի ագրարային համալսարանում, Էջմիածնի քաղաքապետարանում:

Սանասարյանը նշեց, որ առաջիկա օրերին ԲԷՑ-ից կվերադարձնեն մոտ 310 մլն դրամ, 100 մլն դրամ՝ «Հայրենիք-Սփյուռք» ՊՈԱԿ-ից, 210 մլն դրամ՝ «Լուսանշան» ՊՈԱԿ-ից, 1,5 մլն դոլար՝ ԲԷՑ-ին սպասարկող միջազգային կապալառու կազմակերպությունից, նաեւ 40 մլն դրամ եւս ԲԷՑ-ի հետ աշխատող կազմակերպությունից: