Տնտեսական հարցերով խորհրդարանական մշտական հանձնաժողովը սեպտեմբերի 5-ի նիստում դրական եզրակացություն տվեց «Ազատ տնտեսական գոտիների մասին» օրենքում փոփոխություններ կատարելու օրինագծին: Խորհրդարանականները միաձայն քվեարկեցին օրինագծի օգտին:
Օրինագծի նախաձեռնողն է տնտեսական զարգացման եւ ներդրումների նախարար Արծվիկ Մինասյանը:
Հարկ է նշել, որ կառավարության որոշմամբ Հրազդանը կդառնա երկրում չորրորդ ազատ տնտեսական գոտին՝ մայնինգի համար դատա-կենտրոնով: ԱՏԳ էկոհամակարգի կազմակերպիչը կլինի ECOS ընկերությունը, որը պատասխանատու կլինի տեխնոլոգիական կլաստերի զարգացման համար:
ԱՏԳ գլխավոր խնդիրն է դառնալու բլոքչեյնի՝ արհեստական ինտելեկտի եւ մեքենայական ուսուցման հիմքով աշխատող նախագծերի զարգացման համար ենթակառուցվածքների ստեղծումը:
ԱՏԳ էկոհամակարգը կներառի կրթական-հաղորդակցային նախագծեր, հետազոտական լաբորատորիաներ, էլեկտրոնային հարթակներ՝ սթարթափերում ներդրումներ գրավելու համար եւ դատա-կենտրոն՝ մայնինգի համար: ԱՏԳ ռեզիդենտները 25 տարի կունենան ԱԱՀ զրո տոկոս տոկոսադրույք եւ կազատվեն շահութահարկից:
ECOS էկոհամակարգի գործունեության առաջին փուլում նախատեսվում է ներգրավել ավելի քան 100 մլն դոլարի ներդրում:
