Հայ-ռուսական հումանիտար նախաձեռնության իրականացումը, որի մասին հանրահավաքում հայտարարել է վարչապետ Նիկոլ Փաշինյանը, շատ ռեալ է: Այս մասին NEWS.am-ի հետ զրույցում նշեց Պաշտպանության փոխնախարար Գաբրիել Բալայանը:
Հարցին, թե ՀՀ վարչապետ Նիկոլ Փաշինյանը հանրահավաքում հայտարարել էր հայ-ռուսական աննախադեպ հումանիտար նախաձեռնության մասին, ի՞նչ է սա ենթադրում եւ որքանով է դա ռեալ, փոխնախարարն պատասխանեց. «Ռեալությունը շատ բարձր է, պայմանավորվածությունները ձեռք են բերված, մենք աշխատում ենք արդեն համապատասխան իրավական հիմքի վրա, բայց ես չեմ կարող բացահայտել, թե դա ինչ է: Հասարակությունը շատ շուտով կտեղեկանա»:
Դիտարկմանը, որ մամուլում արդեն քողազերծվել է, որ խոսքը Սիրիայում մարդասիրական առաքելության մասին է, որի կազմում լինելու են բժիշկներ, սակրավորներ, Գաբրիել Բալայանն արձագանքեց. «Ես չեմ կարող հրապարակել ամբողջ ծավալով, թե ինչ է լինելու, այն մի քանի փուլից բաղկացած ծրագիր է: Նաեւ այս պահին չեմ կարող բացահայտել աշխարհագրական դիրքը, որովհետեւ դա չի բխում այն պայմանավորվածությունների եւ այն օրենսդրական հիմքերի առկայությունից, որոնք այսօր հայաստանում գործում են»: