Գառնիկ Իսագուլյանը Հայաստանի վարչապետ Նիկոլ Փաշինյանին կոչ է արել ազատվել իր շրջապատից, քանի դեռ այն իրեն ծանր հետեւանքներով քաղաքական խաղերի մեջ չի ներքաշել:
Սեպտեմբերի 13-ին մամուլի ասուլիսի ժամանակ Հայաստանում Արցախի մշտական ներկայացուցչության խորհրդատու-խորհրդականը համեմատեց գրուպենֆյուրեր Հերման Գերինգի եւ Նիկոլ Փաշինյանի հայտարարությունները:
«Գերինգի հայտարարությունը. «Սպանեք, սպանեք, սպանեք եւ մի մտածեք հետեւանքների մասին: Ձեր բոլորի համար ես եմ պատասխանատու»: Փաշինյանի հայտարարությունը. «Ես ինձ վրա եմ վերցնում հասարակական արձագանք ունեցող կալանավորումները»: Սա անընդունելի է: Միթե մեր առաջին դեմքերն ինտելեկտուալ գրքեր չեն կարդում, որպեսզի հասկանան, որ իրենց ասածը ոչ մի կապ չունի օրենքի եւ Սահմանադրության հետ», - նկատեց Իսագուլյանը:
Նրա խոսքով, նա շոկի մեջ է, որ ԱԱԾ ղեկավարը, մարդ, որը պատասխանատու է երկրում անվտանգության համար, «գաղտնալսման» սկանդալից հետո խայտառակ վիճակում հայտնվեց: Նրա խոսքով, այդ սկանդալից հետո ԱԱԾ-ի եւ ՀՔԾ-ի ղեկավարները պետք է հրաժարական տային: Բացի այդ, Իսագուլյանը նշեց, որ նրանք պետք է մի քանի հոդվածներով քրեական պատասխանատվության ենթարկվեն:
«Նրան, ով գաղտնալսել է, պետք է պարգեւատրել, որ ավելի պրոֆեսիոնալ է գտնվել, քան նրանք, որոնք կատարում են իրենց անմիջական պարտավորությունները», - հայտարարեց նա:
Փորձագետն ընդգծեց, որ հեռախոսային խոսակցության ձայանգրությունն ակնհայտ վկայում է, որ Յուրի Խաչատուրովի եւ Ռոբերտ Քոչարյանի դեմ քրեական գործը քաղաքական պատվեր է:
«Հայաստանում չի եղել թավշյա հեղափոխություն: Եկել է ռեժիմ, որն անամոթաբար հրահանգներ է տալիս», - ասաց նա՝ հայտարարելով, որ սա համարում է Հայաստանի սահմաններից դուրս երկար տարիներ մշակված ծրագրի արդյունք: Այս կապակցությամբ փորձագետը նշեց, որ արժե ստուգել Սորոսի հիմնադրամի ֆինանսական գործունեությունը:
Իսագուլյանը նաեւ բացասական գնահատեց այն, որ Փաշինյանն իր աշխատասենյակից, տնից, առաջին դեմքին սպասարկող մեքենայից պարբերաբար ուղիղ եթեր է դուրս գալիս, ինչն անվտանգության նորմերի կոպիտ խախտում է: Նա քննադատեց վարչապետին նաեւ ԱԺ-ում ղարաբաղյան հարցի վերաբերյալ հայտարարությունների համար: Նրա խոսքով, նա ոչ մի պատկերացում չունի բանակցային գործընթացի մասին, նա չունի եւ չի կարող այս հարցի վերաբերյալ որեւէ փաստաթուղթ ունենալ, այլ միայն առաջարկներ, ոչ ավելին: Իսագուլյանը նշեց, որ խոսակցություններն այն մասին, որ Քոչարյանը եւ Սարգսյանը չեն բացառել հողերի վերադարձի հնարավորությունը, իրականությանը չի համապատասխանում:
«Վստահ եղեք, որ ոչ Սարգսյանը, ոչ էլ Քոչարյանը չեն փախչի երկրից, քանի որ երբ դուք շորտերով էիք շրջում, նրանք Ղարաբաղում իրենց ընտանիքների հետ ռմբակոծության տակ էին», - ասաց փորձագետը` դիմելով Փաշինյանին:
Իսագուլյանը Քոչարյանի կողմից կաշառքի դիմաց Կոնգրես հյուրանոցի ձեռքբերման մասին հայտարարությունները մանկապարտեզ համարեց, հավելելով, որ Քոչարյանն անձամբ սթափ եւ հստակ գնահատականներ է հնչեցնում:
«Քոչարյանը եւ Սարգսյանը մարտի 1-ի իրադարձությունների համար մեղավոր չեն, չեն պատրաստվել հողերը վերադարձնել: Ինչ վերաբերում է Խաչատուրովին, ապա Ազգային անվտանգության ծառայության եւ ՀՔԾ-ի ղեկավարների գաղտնալսված հեռախոսային խոսակցությունները ցույց են տալիս, որ Հայաստանը ապուշ իրավիճակում է հայտնվել, եւ ՀԱՊԿ-ի համար ակնհայտ է, որ սա քաղաքական պատվեր է », - ասաց Իսագուլյանը:
