«Երեւանի հանրություն» նախաձեռնությունից Երեւանի քաղաքապետի թեկնածու Անահիտ Թարխանյանը հաղթանակի դեպքում խոստանում է մայրաքաղաքի քաղաքապետարանի կոռուպցիոն սխեմաների դեմ պայքարել: Սեպտեմբերի 19-ին մամուլի ասուլիսում Թարխանյանը նշեց, որ նախաձեռնության հիմնական նպատակը քաղաքային կառավարման գործում կոռուպցիոն սխեմաները բացառելն է:
Նա մասնավորապես, նշեց, որ Երեւանի հաշվեկշռում ավելի քան 1000 ավտոբուս կա, որոնց 60 տոկոսը հագեցած է GPS համակարգով: «Սակայն դրանց նույնիսկ 20 տոկոսը երթուղի դուրս չի գալիս, քանի որ այսպես կոչված «երթուղային գծերի սեփականատերերը» լիովին վերահսկում են տրանսպորտային ոլորտը», - ասաց Թարխանյանը:
Ինչպես նշվեց, առանց այդ խնդրի լուծման անհնար կլինի լուծել հանրային տրանսպորտի օպերատորի ներգրավման հարցը:
Կոռպուցիոն սխեմաների եւս մեկ վառ օրինակ է աղբահանության հետ կապված հարցը:
Թարխանյանը նշեց, որ օրինակ «Սանիթեք» ընկերության ավտոպարկի սպասարկման համար հատկացվող գումարները, պարզապես չեն հասնում հասցեատիրոջը:
«Մենք տեսել ենք, որ աղբատարներն իսկապես ողբալի վիճակում են, սակայն դրանք վերանորոգելու միջոցներ չկան», - ասաց քաղաքապետի թեկնածուն:
Թարխանյանը մատնանշեց այն, որ երեւանցիների իրավունքները տարիների ընթացքում խախտվում են բիզնես հատվածի ներկայացուցիչների կողմից: Դա վերաբերում է այդ թվում բնակելի շենքերի մոտակայքում սրճարանների, ռեստորանների, գիշերային ակումբերի բացմանը: Ելնելով նրանից, որ շատ քաղաքացիների համար դատական ատյաններ դիմելը անթույլատրելի շքեղություն է, Թարխանյանն առաջարկում է քաղաքապետարանին առընթեր հատուկ խորհուրդ ստեղծել, որը քաղաքացիների իրավունքների պաշտպանության համար անվճար խորհրդակցություններ կտրամադրի:
