Մենք կողմնակից ենք արագացված արտահերթ խորհրդարանական ընտրությունների եւ կարծում ենք, որ համապետական ընտրություններն ավելի առաջ պետք է լինեին, որպեսզի արձագնագրվեին հայոց մեծ վերելքի, հեղափոխության ընտրական արդյունքները: Այս մասին, այսօր՝ սեպտեմբերի 23-ին, թիվ 9/06 ընտրական տեղամասում լրագրողների հետ զրույցում նշեց «Ժառանգության» քաղաքապետի թեկնածու Րաֆֆի Հովհաննիսյանը:
«Կողմնակից ենք վաղաժամ եւ որքան հնարավոր է շուտ արտահերթ ընտրություններ անցկացնելուն: Միշտ հակված եղել ենք այլ ուժերի հետ համագործակցության, դա ենթադրում է մյուս ուժերի համաձայնություն: Մենք կտեսնենք, թե այս ընտրություններն ինչպես կանցնեն, ակնկալում ենք, որ շատ ակտիվ կլինենք եւ արդեն մինչեւ խորհրդարանական ընտրությունները արդնե ելնելով իրավիճակից կորոշենք, թե ինչպես մասնակցել»,-ընդգծեց նա:
Ինչ վերաբերում է սեւ քարոզչության վերաբերյալ հարցին, «Ժառանգության. Թեկնածուն նշեց. «Ես չէի գունավորի որեւէ մեկի մոտեցումը, ամեն մեկը ինքնագունավորմամբ է զբաղվել, ամեն մեկն իր իրավունքի մեջ է եղել, ես ասելիք չունեմ: Այս փուլը մի քիչ ավելի էր, քան ստանդարտ նախընտրական վիճակը, մի քիչ ուրիշ հարթության էր եւ հուսով եմ, որ այդ հարթություններն իրենց տեղը կգտնեն համապետականը իր, համաքաղաքայինը իր հարցերում: Պետք չէ խառնել հարթությունները, որովհետեւ ի վերջո, Երեւանի քաղաքացին ունի կոնկրետ խնդիր, կոնկրետ ակնկալիք»:
Րաֆֆի Հովհաննիսյանը հենց այս պահին արդեն շնորհավորեց ապագա հաղթողին. «Հիմիկվանից շնորհավորում եմ հաղթողին: Համարում եմ, որ բոլորը հաղթել են այս ընտրությունների գոյությամբ: Մնացածը որակի խնդիր է, քաղաքական դաշտի կայունության, ստաբիլության հարցն է, որը մի քանի տարի կտեւի»:
Հիշեցնենք, որ Երեւանի ավագանու արտահերթ ընտրությունները մեկնարկել են այսօր՝ սեպտեմբերի 23-ին, առավոտյան ժամը 08.00-ին, եւ կտեւեն մինչեւ երեկոյան 20.00-ն: Երեւանի ավագանու ընտրություններին մասնակցում է 12 քաղաքական կուսակցություն ու դաշինք:
