ԱՊՀ երկրների մրցակցային մարմինների միջեւ արդյունավետ համագործակցության ամրապնդման եւ ԱՊՀ երկրների տարածքում մրցակցային դաշտի բարելավմանն ուղղված աշխատանքների իրականացման համար այսօր՝ սեպտեմբերի 25-ին հատուկ պարգեւի է արժանացել ՀՀ Տնտեսական մրցակցության պաշտպանության պետական Հանձնաժողովի նախագահ Արտակ Շաբոյանը:
ՏՄՊՊՀ-ից NEWS.am-ին հայտնում են, որ պարգեւը հանձնել է ԱՊՀ գործադիր կոմիտեի նախագահ Սերգեյ Լեբեդեւը՝ Սոչիում ընթացքող ԱՊՀ երկրների մրցակցային մարմինների ղեկավարների նիստում: Ս. Լեբեդեւը կարեւորել է ՀՀ Մրցակցային մարմնի դերն ու կատարած աշխատանքը, ինչպես նաեւ ակտիվ համագործակցությունը, որն էլ իր հերթին շարունակաբար նպաստել է ԱՊՀ անդամ երկրներում մրցակցային տասնյակ խնդիրների լուծմանը:
Ա. Շաբոյանը Ռուսաստանի Դաշնություն է մեկնել երկօրյա աշխատանքային այցով՝ մասնակցելու Սոչիում ընթացող ԵՏՄ եւ ԱՊՀ անդամ պետությունների մրցակցային մարմինների ղեկավարների համատեղ նիստին: ՏՄՊՊՀ նախագահը հանդես է եկել ընդարձակ ելույթով՝ ներկայացնելով մրցակցային քաղաքականության ձեւավորման եւ առկա խնդիրների լուծման ուղղությամբ իրականացված քայլերը, ինչպես նաեւ ՀՀ մրցակցային մարմնի փորձը՝ փոխադարձ հետաքրքրություն եւ կարեւորություն ներկայացնող մի շարք շուկաների ուսումնասիրության ոլորտում:
ՀՀ Մրցակցային մարմնի ղեկավարը խոսել է նաեւ ԵՏՄ անդամակցությունից հետո հայկական արտահանող ընկերությունների խնդիրներից, ներկայացրել գործընկերների հետ համատեղ աշխատանքի արդյունքում լուծում ստացած հարցերը:
Ա. Շաբոյանը անդրադարձել է նաեւ մեր երկրում կաթնամթերքի շուկայում հայտնաբերված անբարեխիղճ մրցակցության դեպքերի, որոնք առաջացել են նաեւ ՌԴ արտադրող ընկերության գործունեության արդյունքում:
ՏՄՊՊՀ նախագահը ընդգծել է նաեւ, որ, ԵՏՄ անդամակցությունից հետո, պայմանավորված առեւտրային պայմանների բարելավմամբ, մի շարք սոցիալական կարեւորության շուկաներում անհամեմատ ավելացել են տնտեսվարողները:
«Ընդ որում, դրական դինամիկան արձանագրվել է դիտարկվող բոլոր տարիների ընթացքում եւ միջինացված կարգով տնտեսվարող սուբյեկտների քանակը տարեկան աճել է շուրջ 24 տոկոսով: Այսպես, եթե 2014 թվականին մեր կողմից դիտարկվող լայն սպառման շուրջ 20 ապրանքային շուկաներում ներմուծում էին իրականացնում 284 տնտեսվարող սուբյեկտներ, ապա 2017-ին նրանց քանակն ավելացել է ավելի քան երեք անգամ՝ կազմելով 951:
Այսպես, օրինակ, ալյուրի գծով ներմուծողների քանակն ավելացել է ավելի քան 7 անգամ, ցորենի շուկայում տնտեսվարողներն ավելացել են 7, մարգարինի ներմուծման ոլորտում՝ 4, բրնձի եւ մակարոնեղենի շուկաներում՝ շուրջ 4 անգամ: Նմանատիպ պատկեր է նաեւ հավի մսի, խոզի մսի, բուսական յուղի, ոսպի, ոլոռի, հնդկաձավարի, շոկոլադի եւ այլ շուկաներում»,-ասել է Շաբոյանը:
Նա ընդգծել է, որ այս դինամիկան դրական է անդրադարձել ապրանքային շուկաներում մրցակցային միջավայրի բարելավման վրա՝ հնարավորություն ստեղծելով տասնյակ տնտեսվարողների համար մրցակցել առանց մուտքի խոչընդոտների եւ ակտիվորեն զարգանալ իրենց համար նախընտրելի շուկաներում: Նիստի ընթացքում Եվրասիական տնտեսական միության անդամ պետությունների ղեկավարները քննարկել են նաեւ մի շարք արդիական հարցեր, որոնք կօժանդակեն նվազեցնել ԵՏՄ տարածքում ապրանքային շուկաների մուտքի խոչընդոտները: