Ընթացիկ տարվա առաջին կեսին միգրացիայի բացասական հաշվեկշիռը կազմել է 6146 մարդ: Այս մասին հոկտեմբերի 9-ին լրագրողների հետ հանդիպման ժամանակ ասաց Տարածքային կառավարման եւ զարգացման նախարարության Պետական միգրացիոն ծառայության պետ Արմեն Ղազարյանը:
Նրա խոսքով՝ այս թիվը ներկայացնում է սահմանային անցումների ընդհանուր թվի հանրագումարը, այսինքն՝ երբ նույն մարդը սահմանը հատում է մի քանի անգամ, ապա նա եւս մտնում է այս ցուցանիշի մեջ: «Սակայն մենք ունենք նույնականացվող տվյալներ: Այդ տվյալների համաձայն՝ բացասական սալդոն կազմում է 5204: Տվյալ սալդոն ինքնին բացասական է, բայց եթե այս ցուցանիշը համեմատում ենք նախորդ տարիների թվերի հետ, ապա դրական միտումն ակնհայտ է»,- պարզաբանեց պաշտոնյան: Նա հիշեցրեց, որ 2017 թվականի առաջին կիսամյակի միգրացիոն բացասական սալդոն կազմել է 30853:
