Սաուդյան Արաբիայի ՆԳ նախարար, արքայազն Աբդուլ Ազիզ իբն Նաիֆը հայտարարել է, որ իր երկրի իշխանությունները դատապարտում են ընդդիմադիր լրագրող Ջամալ Հաշքաջիի առեւանգման «կեղծ մեղադրանքները», հայտնում է Saudi Press Agency-ն:
Նրա խոսքով՝ լրագրողին սպանելու հրամանի մասին տեղեկությունը սուտ է եւ մերկապարանոց պնդում:
Արքայազնը շեշտել է, որ Սաուդյան Արաբիայի թագավորությունը մտահոգվում է միջազգային իրավունքի նորմերի պահպանմամբ եւ իր քաղաքացիների շահերով ինչպես երկրի ներսում, այնպես էլ արտասահմանում: Նա աջակցել է գործի քննության մեջ թուրքական եւ սաուդյան հատուկ ծառայությունների համագործակցության գաղափարին եւ հայտնել է լրագրողի անհետացման մասին ամբողջ ճշմարտությունը պարզելու իշխանությունների անկեղծ ձգտման մասին:
Հաշքաջին անհետացել էր հոկտեմբերի 2-ին Ստամբուլում Սաուդյան Արաբիայի գլխավոր հյուպատոսարան մտնելուց հետո: Իշխանությունների պահանջով նա պետք է դիվանագիտական ներկայացուցչությունում անձամբ ստանար ամուսնալուծության մասին փաստաթղթերը: Լրագրողը կնոջը թողել էր մուտքի մոտ իրեն սպասելու, սակայն այդպես էլ չէր վերադարձել:
Հաստատության աշխատակիցները պնդում են, որ նա «պարզապես հեռացել» է: Թուրքիայի իշխանությունների ենթադրությամբ՝ սաուդյան հատուկ ծառայությունները լրագրողին սպանել են ուղղակիորեն շենքում եւ մարմինը դուրս են բերել ավտոմեքենաներից մեկով, որոնք այդ օրը բազմիցս մտել են հյուպատոսարանի տարածք: Հայտարարվել է սեւ ֆուրգոնի հետախուզում, որը հայտնվել է տեսահսկման խցիկների օբյեկտիվում:
Բրիտանական ԱԳՆ-ում աղբյուրը հայտարարել էր, որ միջադեպի հետ կապված Մեծ Բրիտանիան պատժամիջոցներ կկիրառի Սաուդյան Արաբիայի ուժային կառույցների ներկայացուցիչների եւ պաշտոնատար անձանց դեմ: «Մագնիտսկու լրացումների» օգտագործման շրջանակում, որը պատժամիջոցներ է նախատեսում մարդու իրավունքների խախտումների համար, տեղի ունեցածին մասնակցություն ունեցած անձանց անունները կհրապարակվեն:
Հաշքաջին հայտնի էր որպես սաուդյան կառավարության քննադատ: 2017 թվականին նա տեղափոխվել էր ԱՄՆ, որտեղ The Washington Post-ի սյունակի համար հոդվածներ էր գրում գահաժառանգ արքայազն Մուհամմեդ բին Սալմանի բարեփոխումների քննադատությամբ:
