Ինչո՞ւ է Վրաստանում շաքարավազի գինն ավելի թանկ, քան Հայաստանում: Խորհրդարանում քննարկումների ժամանակ նման հարց է տվել Վրաստանի խորհրդարանի փոխնախագահ Լեվան Վեպխվաձեն երկրի նախագահ Միխայիլ Սահակաշվիլի ուշադրությունը հրավիրելով շաքարավազի գնի բարձրացման վրա:
«Վրաստանում շաքարավազի մեկ կիլոգրամը մեկ լարիով (շուրջ 200դրամ) թանկ է, քան Հայաստանում»,- ասել է Վեպխվաձեն:
Նշենք, որ Վրաստանում ներկայումս մեկ կիլոգրամ շաքարավազի միջին գինն արժի 2,5 լարի (1,5 դոլար):
«Չինացիները սպառել են միայն Վրաստանի՞ բաժինը, իսկ Հայաստանինը ո՞չ»,- հետաքրքրվեց փոխնախագահը` հիշեցնելով նախագահի վրացական հեռուստաընկերություններից մեկով ունեցած ելույթը, որի ժամանակ Սահակաշվիլին պատասխանելով բնակչության հարցերին, ասաց որ գների թանկացումները պայմանավորված են միջազգային գործընթացների եւ այլ երկրներում պահանջարկի ավելացման հետ:
«Օրինակի համար ողջ պատմության ընթացքում Չինաստանը սոված է եղել, իսկ հիմա Չինաստանի բնակչությունը սկսել է ուտել: Նրանք մեկուկես միլիարդից ավելի են, պետք է սնվեն…: Բացի այդ , չինացիները սկսել են գնել մեքենաներ, իսկ նախկինում Չինաստանում բոլորը հեծանիվ էին քշում, նրանք բենզին են լցնում, մեծ գործարաններ են կառուցել»,- հեռուստաեթերից ասել էր Սահակաշվիլին: