Մի քանի անձանց կողմից փորձ է կատարվում ԸՕ փոփոխության օրինագծի չընդունումը բարդել ՀՀ ԱԺ ՀՅԴ պատգամավորների վրա՝ որակելով այն որպես սաբոտաժ։Այս մասին այսօր՝ հոկտեմբերի 23-ին ԱԺ–ում ելույթի ժամանակ հայտարարեց ՀՅԴ պատգամավոր Սուրեն Մանուկյանը։
«Հարգելի՛ գործընկերներ, նախ հիշեցնեմ, որ ես, լինելով Տավուշի մարզից ընտրված պատգամավոր, մեկն էի, որ ՀՅԴ որոշումից առաջ միացա համաժողովրդական շարժմանը Տավուշի ընտրողների պահանջով։ Դրա արդյունքում նույնիսկ ես ստացա կուսակցական պատիժ։ Ես ներկայացնում եմ մի կուսակցություն, որը եթե որոշեր սաբոտաժ անել, ապա խմբակցության բոլոր անդամներն էլ չէին քվեարկի, իսկ ինչպես գիտեք ՀՅԴ կողմ է քվեարկել»,–նշեց նա։
Սուրեն Մանուկյանը շեշտեց՝ անձնական խնդիրների պատճառով չի մասնակցել քվեարկությանը. «Իսկ ես իմ անձնական խնդիրների պատճառով չեմ կարողացել մասնակցել այդ քվեարկությանը։ Իմ դիրքորոշումը չի տարբերվում և չի կարող տարբերվել ՀՅԴ դիրքորոշումից։ Կոչ եեմ անում բոլոր նրանց, ովքեր փորձում են էժանագին քայլերով աղավաղել կուսակցության հստակ դիրքորոշումը, դադարեցրեք հակադաշնակցական այդ անպտուղ գործելաոճը»։