ԱՄՆ-ում Դաշնային դատարանը վերականգնել է դատական հայցը, որն անցյալ տարի մերժել էին Մալիից մի խումբ հայցվորներին, որոնք այն ներկայացրել էին շվեյցարական սննդամթերք եւ ըմպելիքներ արտադրող Nestle SA-ի ամերիկյան մասնաճյուղի եւ Cargill ընկերության դեմ՝ նրանց մեղադրելով Աֆրիկայում կակաոյի պլանտացիաներում ստրկությանն օժանդակելու մեջ, հայտնում է «Բլումբերգը»:
Սան Ֆրանցիսկոյի դատարանի նյութերում 6 հայցվորները ներկայացված են որպես նախկին ստրուկ երեխաներ, որոնց իբր առեւանգել էին եւ ստիպել առանց վճարվելու օրական 14 ժամ աշխատել կակաոյի պլանտացիաներում: Մեղադրողները ցանկանում են պատասխանատվության ենթարկել ընկերություններին, որոնք օժանդակել են նրանց նկատմամբ վատ վերաբերմունքին եւ Կոտ դ՛Իվուարի պլանտացիաներում անազատության մեջ պահելուն:
Գործակալությունը նշում է, որ ընկերությունների դեմ հայցը ներկայացվել էր գրեթե 10 տարի առաջ, սակայն անցյալ տարի դատարանը մերժել էր այն բավարարել ապացույցների անբավարարության պատճառով:
Դատարանը հայտարարել է, որ ընկերությունները «լավատեղյակ» էին երկրում մանկական ստրկության տարածվածության մասին: «Nestle-ն եւ Cargill-ը, հավանաբար, այդ պրակտիկայի վրա աչք են փակել, որ ցածր գներից շահույթ ստանան»,- նշում է գործակալությունը:
ԱՄՆ-ում Nestle-ի մասնաճյուղը դատարանի որոշումից հետո հայտարարել է, որ ընկերության համար մանկական աշխատանքն անընդունելի է: Cargill-ը եւս հերքել է մեղադրանքները, նշում է «Բլումբերգը»:
