Սաուդյան Արաբիան եւ ԱՄՆ-ն կպահպանեն քաղաքական հարաբերությունները, չնայած լրագրող Ջամալ Խաշոգջիի հետ տեղի ունեցած ողբերգական միջադեպին, որը սպանվել էր Ստամբուլում սաուդյան հյուպատոսարանում: Արաբական Al Ekhbariya հեռուստաալիքի հետ հարցազրույցում այսպիսի ակնկալիքներով է հանդես եկել թագավորության էներգետիկայի նախարար Խալեդ ալ Ֆալեխը:
«Ես ոչ մի կասկած չունեմ, որ մենք այս վիճակից դուրս կգանք, եւ ամեն ինչ կկարգավորվի: Մենք ԱՄՆ-ի հետ դաշնակիցներ ենք մեծ թվով աշխարհաքաղաքական հարցերում, որոնք ավելի խոշոր են, քան այս սարսափելի իրավիճակը, Ջամալ Խոշոգջիի ողբերգական մահը: Եվ սա ոչ թե մահ է, այլ սպանություն, մենք դա ընդունել ենք: Ես վստահ եմ, որ մենք դաշնակիցներ եւ բարեկամներ ենք, ու ԱՄՆ-ն կհասկանա, որ Սաուդյան Արաբիան տեղի ունեցածի համար նույնքան վշտացած է, որքան ցանկացած որեւէ մեկը, եւ գուցե ավելի է վշտացած, քանի որ դա ազդել է մեր հեղինակության վրա»,- պատասխանել է նա 2 երկրների հարաբերությունների ապագայի մասին հարցին:
Հիշեցնենք, որ Սաուդյան Արաբիան ԱՄՆ նավթի խոշորագույն մատակարարն է: