Ռուսաստանը Հայաստանի ռազմավարական գործընկերն է եւ շարունակում է մնալ այդպիսին: Այս մասին հոկտեմբերի 26-ին ԱԺ-ում ավանդական ճեպազրույցների ժամանակ ասաց ԱԺ «Ծառուկյան» դաշինք խմբակցության քարտուղար Վահե Էնֆիաջյանը՝ մեկնաբանելով ԱՄՆ նախագահի ազգային անվտանգության հարցերի խորհրդական Ջոն Բոլթոնի հայտարարությունն այն մասին, որ Հայաստանը կարող է ազատվել ռուսական ազդեցությունից:
Պատգամավորը նշեց, որ հակառակը՝ կա չօգտագործված ներուժ, որն ապագայում հայկական կողմը պետք է իրականացնի՝ չբացառելով նաեւ եվրոպական երկրների հետ հարաբերությունների զարգացումը: «Իմ կարծիքով՝ այսպիսի դիրքորոշումը կարող է դրական անդրադառնալ մեր երկրի վրա»,- պարզաբանեց Էնֆիաջյանը:
Հիշեցնենք, որ ԱՄՆ նախագահի ազգային անվտանգության հարցերի խորհրդական Ջոն Բոլթոնը Անդրկովկասի երկրներով իր շրջագայության ժամանակ այցելեց նաեւ Հայաստան: