Սիրիան քննարկում է Եվրասիական տնտեսական միության առանձին երկրների հետ առեւտրային արտոնությունների ռեժիմ ստեղծելու հնարավորությունը եւ մոտ ապագայում, հնարավոր է, բարձրացնի միավորմանն անդամակցելու հարցը: Այս մասին «Իզվեստիա» պարբերականի հետ հարցրազրույցում հայտնել է Սիրիայի էկոնոմիկայի նախարար Սամեր ալ Հալիլը:
«Եվրասիական միավորմանն անդամակցելու համար անհրաժեշտ է նախ մաքսային համաձայնագրեր կնքել, կարգավորել այդ ոլորտի օրենսդրությունը, ստանալ բոլոր անդամ երկրների համաձայնությունը: Այս իմաստով ազատ առեւտրի գոտու բացումն ավելի հեշտ է, բայց դարձյալ համընդհանուր համաձայնության առկայությամբ,- ասել է նա: - Ուստի մենք քննարկում ենք առանձին երկրների, օրինակ՝ Ռուսաստանի հետ արտոնյալ առեւտրային ռեժիմ ստեղծելու հնարավորությունը: Սիրիայի տնտեսությունը սրընթաց զարգանում է, եւ հնարավոր է՝ մենք դեռ կբարձրացնենք մոտ ապագայում ԵՏՄ-ին անդամակցելու հարցը»:
Սամեր ալ Հալիլը հավելել է, որ առայժմ դժվար է կոնկրետ ժամկետներ նշել, թե Սիրիայի տնտեսությունը երբ կհասնի մինչպատերազմական զարգացման մակարդակին, սակայն որոշ հաշվարկներով նրա վերականգնումը կտեւի «մինչեւ 10 տարի, ոչ պակաս»: Ի պատասխան միջերկրածովյան շելֆում օգտակար հանածոների արդյունահանման մասին հարցին՝ ալ Հալիլը չի բացառել, որ Սիրիայի ներքաղաքական իրավիճակի կայունացումից հետո երկիրը կարող է շելֆում սկսել նավթի արդյունահանումը: