Ինդոնեզիայի տրանսպորտի անվտանգության ազգային կոմիտեն ավստրալացի մասնագետների օժանդակությամբ կարողացել է ստանալ Ինդոնեզիայում կործանված Boeing 737-ի ինքնագրի տվյալները, հայտնում է Detik պորտալը:
Պարամետրիկ ինքնագրի տվյալներում առկա է օդանավի չվերթների 69 ժամվա տեղեկություն՝ ներառյալ վերջին թռիչքը:
Ինդոնեզիական Lion Air բյուջետային ավիաընկերության Boeing 737-ը, որն անցած երկուշաբթի առավոտյան Ջակարտայից ուղեւորվել էր Սումատրայի մոտ գտնվող կղզիներից մեկը, թռիչքից 13 րոպե հետո ծովն էր ընկել Արեւմտյան Ճավայի ափերի մոտ: Օդանավի բեկորները գտնվում են 30-ից մինչեւ 40 մետր խորությամբ եւ տարածված են ծովի հատակի ընդարձակ տարածքում:
Ավիաաղետի պատճառները դեռեւս պարզ չեն: Կործանված օդանավն արտադրվել է 2018 թվականին եւ ավիաընկերության կողմից շահագործվում էր օգոստոսից: Ինդոնեզիացի փրկարարների տեղեկություններով՝ ողջ մնացածներ չկան: Օդանավում եղել է 189 մարդ՝ ներառյալ ուղեւորներն ու անձնակազմի անդամները:
Աղետի ենթարկված Boeing-ի սեւ արկղերից մեկը գտել են նոյեմբերի 1-ին բեկորների կողքին:
Երկրորդ սեւ արկղի եւ աղետի զոհերի մարմինների որոնումները երկարացվել էին 3 օրով: Ինդոնեզիայի արտակարգ իրավիճակների դեմ պայքարի գործակալության ղեկավարի խոսքով՝ ենթադրվում է, որ երկրորդ ինքնագիրը գտնվում է որոնումների հիմնական գոտուց մոտ 50 մետր հեռավորությամբ, սակայն որոնումները դժվարեցնում են ստորջրյա հոսանքները: