ԲՀԿ–ում երբեք դեֆիցիտ չի եղել որեւէ բանի՝ հատկապես մարդկային ներուժի։ Այս մասին NEWS.am–ի հետ հարցազրույցում ասաց ՀՀ ԱԺ «Ծառուկյան» խմբակցության պատգամավոր Միքայել Մելքումյանը՝ մեկնաբանելով «ռեյտինգային» թեկնածուների պակասի հարցը։
Ասաց, իրենց ռեյտինգայինները 10 տարուց ավելի գործում են եւ տեղերում հեղինակավոր մարդիկ են։
Միքայել Մելքումյանը մեծամասնական ընտրակարգով կառաջադրվի Կենտրոն համայնքից։
«Քանի որ ես եղել եմ նախորդ եւ գործող գումարման խորհրդարանների ամենաակտիվ պատգամավորը, կարծում եմ դա կհամոզի իմ ընտրողներին՝ ձայն տալ իմ օգտին։ Ես անձամբ գնում եմ խանութ, դպրոց, մանկապարտեզ, քայլում եմ փողոցում, իջնում եմ Հրազդանի ձոր եւ մարդկանց վերաբերմունքը տեսնում եմ։ Եթե տեսնեի, որ մի փոքր նեգատիվ բան կա, երբեք չէի առաջադրվի»,–ասաց նա։
Նա եւս լուրեր լսել է, որ Նաիրա Զոհրաբյանը «ռեյտինգայինով» առաջադրվելու է Սյունիքի մարզից։
ԲՀԿ թե՛ համամասնական, թե՛ մեծամասնական ցուցակների վերջնական պատկերը պարզ կլինի Գագիկ Ծառուկյանի հայտարարությունից հետո։
