ՀՀԿ խորհրդի նիստում երկու կարեւոր հարց է քննարկվում, մեկը ԱԺ ընտրություններին մասնակցության հարցը, մյուսը ներքաղաքական իրավիճակին վերաբերող հարց։ Այս մասին քիչ առաջ ՀՀԿ կենտրոնական գրասենյակում լրագրողների հետ զրույցում նշեց Էդուարդ Շարմազանովը։
Նա նշեց, որ ՀՀԿ խորհրդի նիստից անմիջապես հետո ճեպազրույց կտա կուսակցության ներկայացուցիչ, պաշտպանության նախկին նախարար Վիգեն Սարգսյանը։
Շարմազանովը նաեւ ընդգծեց, որ այսօր ՀՀԿ համամասնական ցուցակը չի հրապարակվի, դա կարվի առաջիկա մի քանի օրերին։ Վերջնաժամկետը նոյեմբերի 14-ն է։
Շարմազանովը խոսեց նաեւ ընտրություններին մասնակցելու վերաբերյալ իր դիրքորոշան մասին՝ հայտարարելով, որ ինքն առաջին մարդկանցից է եղել, ով կողմ է եղել ընտրություններին կուսակցության մասնակցելուն։
«Ես ոչ միայն կողմ եմ, ես ջատագովն եմ եղել ի սկզբանե, որ, անկախ նրանից՝ դեկտեմբերը ձեռնտու է, ձեռնտու չէ, ափալ-թափալ է, թե ափալ-թափալ չէ՝ կուսակցությունը պարտավոր է մասնակցել ընտրություններին, եթե այն քաղաքական ուժ է: Իսկ մեր կուսակցությունն այն կուսակցությունն է, որը Հայաստանի անկախության ակունքներում կանգնած քաղաքական ուժ է: Մենք տեսնում ենք այն մարտահրավերները, որ կան, եւ ունենք եւ՛ ասելիք, եւ՛ անելիք»,- հայտարարեց նա:
Նշենք, ՀՀԿ խորհրդի նիստը վարում է կուսակցության նախագահ Սերժ Սարգսյանը: Նիստի օրակարգում առաջիկա խորհրդարանական արտահերթ ընտրությունների հետ կապված հարցերն են, այդ թվում ընտրություններին մասնակցել-չմասնակցելու, իսկ մասնակցելու դեպքում նաեւ համամասնական ցուցակի հարցը։
