Շատ լավ է, որ կա օպերատիվ կապ Հայաստանի եւ Ադրբեջանի զինված ուժերի մակարդակով, դա նախագահի ու վարչապետի միջեւ կապ չի, ինչպես դա բացատրեց պաշտպանության նախարար Դավիթ Տոնոյանը։ Այս մասին, այսօր՝ նոյեմբերի 11-ին, ՀՀԿ խորհրդի նիստից հետո լրագրողների հետ զրույցում նշեց պաշտպանության նախկին նախարար Վիգեն Սարգսյանը։

Նրա խոսքով, նման կապը կարեւոր է եւ այդպիսի կապ եղել է նախկինում. «Պարբերաբար նաեւ հատուկ կապ ձեւավորվել է, երբ եղել է քննարկելու հարց, դա տեխնիկապես դժվար չի։ Իմ նախարար եղած ժամանակ երկու անգամ նման բան եղել է։ Լարված շրջանում նման կապ ունենալը կարող է օգտակար լինել չնախատեսված կամ պատահական զարգացումների լարումից»«-ասաց Վիգեն Սարգսյանը։

Անդրադառնալով ՀԱՊԿ գլխավոր քարտուղարի ընտրության հարցին, նա ասաց. «Մեր իշխանությունն ամեն ինչ պետք է անի թույլ չտալու համար ՀԱՊԿ գլխավոր քարտուղարի պաշտոնի կորուստը։ Եթե դեկտեմբերի 6-ին մենք զիջենք, դա կլինի ձախողում։ Այդ ռիսկը պարտադիր պետք էր հաշվի առնել քայլեր ձեռնարկելիս։

Ես կարծում եմ ցանկացած մեկը պետք է հասկանար, թե ինչքան հակաճնշում կար ղարաբաղյան պատերազմի բովով անցած մարտական գեներալին այդ պաշտոնում նշանակելու ՀՀ ջանքերին»։

Վիգեն Սարգսյանը չհամաձայնեց դիտարկմանը, թե ՀԱՊԿ-ն չի արձագանքել ղարաբաղյան հակամարտությունում իրավիճակի լարումներին. «Առնվազն 5 անգամ եղել է ՀԱՊԿ գլխավոր քարտուղար Բորդյուժայի հայտարարությունները ռազմական գործողությունների հետ կապված եւ ոչ միայն ապրիլյան պատերազմի ժամանակ։ ՀԱՊԿ-ը լուրջ կառույց է, որն ունի կոլեկտիվ պաշտպանություն ենթսդրող հոդված, ՀԱՊԿ-ն ունի մեխանիզմներ ներքին գներով զենք-զինամթերք ձեռք բերելու, ունի համատեղ զորավարժությունների շատ ընդարձակ գործիքակազմ։ Հայաստանը ՀԱՊԿ-ում եղել է ամենաակտիվ դերակատարներից, որն ունեցել է իր ծանրակշիռ խոսքը»,-հայտարարեց նա։