Վերջին շրջանում տեղի են ունեցել ոտնձգություններ Հայ առաքելական եկեղեցու նկատմամբ, ուստի ժամանակն է, որ կարգավորվի Հայ առաքելական եկեղեցուն սեփականության կամ վարձակալության իրավունքով պատկանող տարածքներում՝ առանց նրա համաձայնության հավաքներ անցկացնելուխնդիրը։ Այս մասին այսօր՝ նոյեմբերի 15-ին, ԱԺ–ում «Հավաքների ազատության մասին» Հայաստանի Հանրապետության օրենքում լրացում կատարելու մասին» օրինագծի քննարկման ժամանակ հայտարարեց նախագծի համահեղինակ, 6-րդ գումարման ԱԺ ՀՀԿ խմբակցության պատգամավոր Միհրան Հակոբյանը։ «Օրենքի նախագծի ընդունումը թույլ կտա հաշվի առնել Հայ առաքելական եկեղեցու կարծիքը՝ հավաքների անցկացման վերաբերյալ: Նախագծի ընդունման դեպքում օրենքով սահմանված կարգով կչեզոքացվեն Հայաստանի Հանրապետության տարածքում Հայ առաքելական եկեղեցուն սեփականության կամ վարձակալության իրավունքով պատկանող տարածքներում հասարակական կարգը խախտելուն միտված եւ կրոնական հիմքով անհանդուրժողականության մթնոլորտի ձեւավորման հետ կապված վտանգները»,–նշեց պատգամավորը:
Նա շեշտեց՝ խնդիրը Հայ առաքելական եկեղեցու դեմ բողոքելու իրավունքը սահմանափակելը չէ։
ՀՀ արդարադատության փոխնախարար Արթուր Հովհաննիսյանն էլ հայտնեց, որ կառավարությունը օրինագիծը ուսումնասիրելուց հետո առաջարկել է «Հավաքների ազատության մասին» օրենքը անփոփոխ թողնել։ «Այս նախագիծը լուրջ խնդիրներ ունի։ Մասնավորապես հավաքների ազատության անհիմն ու անուղղակի սահմանափակման միտում ենք տեսնում, ինչը հակասում է ոչ միայն սահմանադրության 44-րդ հոդվածին, որի համաձայն յուրաքանչյուր ոք ունի խաղաղ, առանց զենքի հավաքներին մասնակցելու եւ նման հավաքներ կազմակերպելու իրավունք, այլ նաեւ Մարդու իրավունքների եւ հիմնարար ազատությունների կոնվենցիայի 11-րդ հոդվածը, որը եւս հավաքների ազատության երաշխավորման դրույթներ է սահմանում»։
Փոխնախարարը ընդգծեց՝ բազմաթիվ վճիռներ կան ՄԻԵԴ–ում, որի համաձայն խաղաղ հավաքների իրավունքը հիմնարար իրավունք է ժողովրդավարական հասարակություններում, պետությունները չպետք է անհիմն ու անուղղակի սահմանափակեն այդ իրավունքը։
«Իսկ առաքելական եկեղեցու տարածքում հավաքները սահմանափակելու առնչությամբ պետք է դիտել, թե որքանով է սահմանափակվում այլոց հիմնարար իրավունքերը, եթե այդ իրավունքները գերակայում են հավաքների ազատության իրավունքին։ ՄԻԵԴ–ի վճռով սահմանվել է, որ հավաքը կարող է սահմանափակվել, եթե խախտվում է մարդկանց կրոնական ազատության իրավունքը, սակայն պետք է համոզվել նախ որ կրոնական ազատության իրավունքը խախտվում է»,–նշեց Հովհաննիսյանը։
«Ծառուկյան» խմբակցության պատգամավոր Գեւորգ Պետրոսյանն էլ կոչ արեց չանտեսել սահմանադրության այն հոդվածը, որով ճանաչվում է Հայ առաքելական եկեղոցու բացառիկ դերակատարությունը հայ ժողովրդի հոգեւոր կյանքում։ «Այս նախագիծը ուղղված է հայ առաքելական եկեղեցին վտանգավոր սողոսկումներից պաշտպանելուն»,–հավելեց նա։
