Ազգային ժողովի ընտրություններից հետո կառավարությունը դարձյալ, ինչպես նախկինում, օրենսդրության ոլորտում ավելի ակտիվ կլինի, քան խորհրդարանը: Այս մասին նոյեմբերի 19-ին լրագրողների հետ հանիպման ժամանակ ասաց «Հայրենական արտադրողների միության» ՀԿ նախագահ Վազգեն Սաֆարյանը:
Փորձագետի խոսքով՝ սա գլխավորապես վերաբերում է տնտեսության ոլորտում օրինագծերին:
«Հաշվի առնելով այն, որ առաջիկա ընտրություններում կուսակցությունների ցուցակներում տնտեսագետները շատ սակավաթիվ են, ապա կարելի է ենթադրել, որ օրենսդրական նախաձեռնությունը հիմնականում բխելու է գործադիր իշխանությունից»,- նշեց Վազգեն Սաֆարյանը:
Փորձագետն ընդգծեց, թե սա խոսում է այն մասին, որ ներկայիս պայմաններում քաղաքական ուժերի համար առավել կարեւոր է քաղաքական բաղադրիչը, քան տնտեսական:
«Ազգային ժողովը մեծամասամբ կընդունի կառավարության առաջարկած տնտեսական օպրինագծերի քաղաքական որոշումներ»,- եզրափակեց Վազգեն Սաֆարյանը:
Հիշեցնենք, որ արտահերթ խորհրդարանական ընտրությունները տեղի կունենան դեկտեմբերի 9-ին: Դրանց կմասնակցեն 11 քաղաքական ուժեր: