Դատախազը բողոքարկել է Գյումրիում առերևույթ բռնաբարության փորձ կատարելու համար մեղադրվող Հ. Շահնազարյանի նկատմամբ ընտրված խափանման միջոց կալանավորումը գրավով փոխարինելու վերաբերյալ որոշումը։ Այս մասին NEWS.am—ի հարցմանն ի պատասխան հայտնել ՀՀ գլխավոր դատախազության հանրային կապերի բաժնից։
Հոկտեմբերի 29-ին, Գյումրի քաղաքի Մուշ 2 թաղամասի մի բնակչուհի հաղորդում և դիմում է տվել այն մասին, որ նույն օրը առավոտյան տանը միայնակ գտնվելու ժամանակ լսելով դռան թակոց, առանց նայելու բացել է այն և մտել լոգարան: Հետևից բնակարան է մտել մի երիտասարդ, ձեռքով փակել իր բերանը, գլուխը հարվածել լոգարանի պատերի սալիկներին, որից հետո իրեն տարել է ննջասենյակ և փորձել բռնաբարել, սակայն իր կամքից անկախ հանգամանքներով հանցագործությունն ավարտին չի հասցրել:
Դեպքի առթիվ 2018 թվականի հոկտեմբերի 29-ին ՀՀ քննչական կոմիտեի Շիրակի մարզային քննչական վարչությունում ՀՀ քրեական օրենսգրքի 34-138-րդ հոդվածի 1-ին մասով հարուցվել է քրեական գործ:
Նույն օրը բռնաբարության փորձ կատարելու կասկածանքով ոստիկանության Գյումրի քաղաքի Մուշի բաժին բերման է ենթարկվել Հ. Շ.-ն և ձերբակալվել:
Նույն օրը Շիրակի մարզի ընդհանուր իրավասության դատարանը, քննության առնելով Հ. Շ.-ի պաշտպանի բողոքը՝ ձերբակալման ոչ իրավաչափ լինելու և անհապաղ ազատ արձակելու մասին, բավարարել է այն և Հ.Շահբազյանին ազատ արձակել:
2018 թվականի նոյեմբերի 1-ին Հ. Շ.-ին ՀՀ քրեական օրենսգրքի 34-138-րդ հոդվածի 1-ին մասով մեղադրանք է առաջադրվել և միջնորդություն է ներկայացվել Շիրակի մարզի ընդհանուր իրավասության դատարան մեղադրյալի նկատմամբ որպես խափանման միջոց կալանավորումը կիրառելու վերաբերյալ, որը բավարարվել է: Ըստ դատախազությունից ստացված պատասխանի՝ Դատարանը այդ որոշմամբ նաև գտել է, որ այլընտրանքային խափանման միջոց գրավը չի կարող չեզոքացնել մտավախությունը, որ Հ. Շ.-նը, փաստացի գտնվելով ազատության մեջ, չի խոչընդոտի գործի քննությանը:
Նոյմեբերի 6-ին սակայն, ընդհանուր իրավասության առաջին ատյանի դատարանը բավարարել է պաշտպանի միջնորդությունը՝ Հ.Շ.-ի նկատմամբ որպես խափանման միջոց կիրառված կալանավորումը գրավով փոխարինելու մասին, և գրավի չափ է սահմանել 500.000 ՀՀ դրամը, որը նույն օրը մուծվել է, և Հ.Շ.-ն ազատ է արձակվել:
Վերջինիս շահերի պաշտպանը նաև միջնորդություն էր ներկայացրել Շիրակի մարզի դատախազություն՝ խնդրելով անհրաժետությունը վերանալու հիմքով վերացնել մեղադրյալ Հ.Շ-ի նկատմամբ որպես խափանման միջոց ընտրված կալանավորումը:
«Նկատի ունենալով, որ քրեական գործով վարույթի ընթացքում մեղադրյալ Հ. Շ.-ի ոչ պատշաճ վարքագիծը կանխելու որպես բացառիկ երաշխիք հանդիսանում է կալանավորման ձևով ընտրված խափանման միջոցը, իսկ այլընտրանքային խափանման միջոց գրավ կիրառելու պարագայում մեղադրյալը, գտնվելով ազատության մեջ, կարող է թաքնվել քրեական վարույթն իրականացնող մարմնից, խոչընդոտել մինչդատական վարույթում գործի քննությանը` քրեական դատավարությանը մասնակցող անձանց վրա անօրինական ազդեցություն գործադրել, գործի համար նշանակություն ունեցող նյութերը թաքցնել կամ կեղծել, քրեական վարույթն իրականացնող մարմնի կանչով առանց հարգելի պատճառների չներկայանալ կամ այլ ճանապարհով և խուսափել քրեական պատասխանատվությունից, ինչը կհակասի գործի հանգամանքների բազմակողմանի, լրիվ և օբյեկտիվ հետազոտմանը, ինչպես նաև հաշվի առնելով նրան մեղսագրվող արարքի բնույթը, հասարակական վտանգավորության աստիճանը՝ նոյեմբերի 8-ին որոշում է կայացվել մեղադրյալ Հ. Շահնազարյանի նկատմամբ ընտրված խափանման միջոց կալանավորումը վերացնելու վերաբերյալ պաշտպան Էդգար Թումասյանի ներկայացած միջնորդությունը ամբողջությամբ մերժելու մասին»,- հայտնում են դատախազությունից:
Նոյեմբերի 16-ին դատախազի կողմից վերաքննիչ բողոք է բերվել խափանման միջոց կալանավորումը գրավով փոխարինելու վերաբերյալ միջնորդությունը քննության առնելու մասին Շիրակի մարզի ընդհանուր իրավասության դատարանի որոշման դեմ:
