Այն, ինչ տարիներով կատարվել է փոքր հէկ-երի ոլորտում, այլ բառով, քան այլանդակություն, չի կարելի անվանել: Կառավարության այսօրվա՝ նոյեմբերի 22-ի նիստում հայտարարեց առաջին փոխվարչապետ Արարատ Միրզոյանը:
«Ենթադրենք թույլտվություն ունեն X քանակի ջուր օգտագործելու, բայց 3-4 անգամ ավելի շատ են օգտագործում: Ունենք դեպքեր, երբ հէկ-ից ջուրը որեւէ ձեւով չի վերադարձվում գետ կամ ջրանցք, այլ գնում կորչում է: Ախուրյան եւ Եղեգիս գետերի վրա կատարվողը լրջագույն լրջագույն վերանայման եւ իրավապահ համակարգի ներգրավման ու ուսումնասիրման կարիք ունի»,-հայտարարեց Միրզոյանը:
Գլխավոր դատախազ Արթուր Դավթյանը նշեց, որ փոքր հեկ-երում հայտնաբերված խախտումներով մեկ ամբողջական քրեական գործ է հարուցվել, այդ թվում ջրաչափերի բացակայության հետ կապված: Նա նշեց, որ անկախ քրեական գործից, այսօր հնարավոր է որոշակի ձեւով պարզել, թե X քանակի էլէկտրաէներգիա արտադրելու համար որքան ջուր է անհրաժեշտ եւ հետագայի համար կարգավորել խնդիրը:
Պետական վերահսկողության ծառայության ղեկավար Դավիթ Սանասարյանն էլ նշեց, որ ուսումնասիրություն են իրականացրել «Արտաշատի» ՋՕ-ում եւ խախտումներ են հայտնաբերել, այդ թվում նաեւ գյուղացիներից գումարներ են հավաքել, սակայն մուտք չեն արել բյուջե:
Վարչապետի պաշտոնակատար Նիկոլ Փաշինյանը հանձնարարեց ուսումնասիրություններ անել նաեւ մյուս ՋՕ-ներում եւ փաստերը ներկայացնել իրավապահ մարմիններին: