Մենք պետք է մեր հարաբերությունները Ռուսաստանի հետ բարձրացնենք նոր մակարդակի եւ ԵՏՄ-ի, եւ ՀԱՊԿ-ի, նաեւ երկկողմ մակարդակով: Այս մասին, այսօր՝ նոյեմբերի 27-ին, Վանաձորի հրապարակում բնակիչների հետ հանդիպման ժամանակ հայտարարեց ՀՀ վարչապետի պաշտոնակատար, «Իմ քայլը» դաշինքի ցուցակը գլխավորող Նիկոլ Փաշինյանը:
Նա անդրադարձավ ՀԱՊԿ-ում ստեղծված իրավիճակին՝ նշելով. «ՀԱՊԿ-ում բուռն քննարկումներ են տեղի ունենում, որի իմաստը անդամ երկրների դաշնակցային հարաբերությունները հստակեցնելն է: Օրինակ, դուք գիտե՞ք, թե ՀԱՊԿ-ն մեր նկատմամբ ինչ պարտավորություն ունի, մենք իր նկատմամբ ինչ պարտավորություն ունենք: Մեզ համար այնքան էլ ընդունելի չէ եւ պարզ չէ, թե ինչու են մեր դաշնակիցները զենք վաճառում մեր նկատմամբ թշնամաբար տրամադրված երկրին: Սա լուրջ մարտահրավեր է եւ մենք մտադիր ենք մեր գործընկերների հետ այս թեման պարզ, շիտակ քննարկել, որպեսզի մենք մեր անելիքները իմանանք: Իմանանք՝ ում վրա պիտի հույս դնենք, ում վրա՝ չդնենք»:
Այդուհանդերձ, Փաշինյանը հայտարարեց, որ ընդհանրապես ՀՀ քաղաքականության տրամաբանությունը պետք է լինի այն, որ մեր հույսը դնենք մեզ վրա, իսկ դրա համար պետք է ուժեղանանք:
Հիշեցնենք, որ ՀԱՊԿ գլխավոր քարտուղար ընտրության հարցում լուրջ հակադրություն է առաջացել անդամ երկրների միջեւ: Նոյեմբերի 8-ին Աստանայում տեղի ունեցած ՀԱՊԿ ղեկավարների հանդիպումից հետո Բելառուսի նախագահ Ա. Լուկաշենկոն հանդիպել էր Ադրբեջանի դեսպանի հետ եւ քննարկել ՀԱՊԿ ղեկավարների փակ հանդիպումը, ինչից հետո ՀՀ վարչապետի պաշտոնակատար Նիկոլ Փաշինյանը հայտարարել էր, թե Լուկաշենկոն պետք է բացատրություններ տա այդ քայլը կատարելու համար: Դրան ի պատասխան՝ Բելառուսի ԱԳՆ-ն հայտարարել է, որ «Փաշինյանը հավանաբար իրեն միջազգային դատախազի տեղ է դրել»:
ՀԱՊԿ-ի հերթական նիստը տեղի կունենա դեկտեմբերի 6-ին Սանկտ Պետերբուրգում, որտեղ որոշում կկայացվի կազմակերպության գլխավոր քարտուղարի թեկնածության վերաբերյալ:
