ԱՄՆ առաջին տիկին Մելանյա Թրամփը ամուսնու՝ երկրի նախագահ Դոնալդ Թրամփի ընկերակցությամբ չորեքշաբթի վառել է Ամերիկայի գլխավոր ծննդյան եղեւնու լույսերը, որը տեղադրված է Սպիտակ տնից ոչ հեռու պուրակում, փոխանցում է «ՌԻԱ Նովոստի»-ն:
Նախագահական զույգը հայտնվել է զրահապատ ապակուց պատնեշի մոտ, որի հետեւում տեղադրված էր նախագահական խորհրդանիշով ամբիոնը: Թրամփը հագել էր իր համար ավանդական սեւ երկար վերարկու, Մելանյան ամբողջությամբ սպիտակ հանդերձանքով էր՝ վերարկուն, բարձր օձիքով սվիտերը, ձեռնոցները սպիտակ էին:
«Բոլորին մաղթում եմ երջանիկ Սուրբ ծնունդ: Դա մենք պետք ուղղակի միասին ասենք՝ երջանիկ-երջանիկ Սուրբ ծնունդ: Ձեզ հետ լինելը հրաշալի է: Եկեք վառենք եղեւնու լույսերը: Դա կանի առաջին տիկինը»,- միանգամից գործի է անցել Թրամփը:
Դրանից հետո նա սկսել է հետադարձ հաշվարկը 10-ից 1, որին աջակցել են արարողության հյուրերը: Հաշվարկի վերջին Մելանյան սեղմել է կոճակը, եւ նույն պահին վառվել են նրանց հետեւում տեղադրված եղեւնու լույսերը, որը պսակում էր քառանկյուն ոսկե աստղը:
Նախագահական զույգն այնուհետեւ նստել է առաջին շարքում եւ դիտել ծննդյան թեմայով արտիստների ելույթը: Թրամփը ժամանակ առ ժամանակ ճոճվում էր երաժշտության տակտի ներքո, իսկ երբ վարողը հանկարծ հայտարարել է, որ ինքն ու բոլորը սիրում են Ամերիկան եւ անձամբ Թրամփին, ներկաները ծափահարել են, ոտքի կանգնել, ինչից հետո Թրամփը եւս ոտքի է կանգնել եւ ի պատասխան ձեռքով թափահարել: Երբ համերգային մասն ավարտվել է, ՆԳ նախարար Ռայան Զինկեն Թրամփին դիմելով հայտարարել է. «Ահա այն մարդը, որը Ծննդյան տոնը հետ բերեց Ամերիկա»:
Ի պատասխան նրան շնորհակալություն հայտնելով՝ ԱՄՆ նախագահը դիմել է արարողության հյուրերին: Նա շնորհակալություն է հայտնել ազգային պարկերի հիմնադրամի աշխատակիցներին, արտիստներին, ուսանողներին, որոնք այս պուրակում 56 եղեւնիների զարդարման էսքիզների հեղինակն էին: Այս թիվը խորհրդանշում է ԱՄՆ նահանգների եւ տարածքների քանակությունը: Թրամփը նաեւ հակիրճ հիշեցրել է տոնի պատմությունը:
«Մենք մեկ ամերիկյան ընտանիք ենք: Մենք միասին ենք տանջվում, միասին ապաքինվում, եւ մենք մշտապես միասին առաջ կմղվենք: Սա Ամերիկայի Միացյալ Նահանգներ է: Մենք աշխարհում լավագույնն ենք: Եվ չկա մեկը, որ կմոտենա մեզ»,- հայտարարել է Թրամփը:
