Շատերի մոտ այն տպավորությունն է, որ իմ նախագահության օրոք Հայաստանի եւ Ռուսաստանի հարաբերությունները բացարձակ անխռով են եղել, սակայն մենք այնքան խոհեմություն ունեինք, որ խնդիրները հասարակությանը չէինք ներկայացնում։ Այս մասին հայտարարել է Հայաստանի երկրորդ նախագահ Ռոբերտ Քոչարյանը՝ ելույթ ունենալով Երեւանում Լազարյան ակումբի նիստում եւ պատասխանելով այն հարցին, թե արդյոք իրեն չի անհանգստացնում հայ-ռուսական հարաբերությունների այժմյան իրավիճակը։
Նրա խոսքով՝ եթե փոխհարաբերությունների դժվարություններն ի ցույց դնես, ապա հետո կսկսեն գնահատել՝ լավն էր, թե վատը գտնված լուծումը։ Դա հատկապես կարեւոր է հայ-ռուսական հարաբերություններում, որտեղ «Ռուսաստանի պոտենցիալը 40-50 անգամ գերազանցում է հայկական պոտենցիալին»՝ նշել է Քոչարյանը։
«Դա միշտ պետք է հաշվի առնել, եւ այստեղ զգացմունքները չպետք է առաջ վազեն մտքից եւ սթափ գնահատականից, որ կա երկրի համար պատասխանատվություն եւ չմտածված արարքների հետեւանքներ»,- հայտարարել է նա։