Այն, ինչ տեղի ունեցավ Հայաստանում, աննախադեպ էր, սակայն, շարժման արդյունքը ցույց տվեց, որ տեղի է ունեցել մարդափոխություն. Սերժ Սարգսյանին փոխարինել է Նիկոլ Փաշինյանը։ Այս մասին այսօր՝ դեկտեմբերի 5–ին, Հանրային հեռուստաընկերության եթերում նախընտրական մեծ բանավեճի ժամանակ ասաց ՀՅԴ համամասնական ցուցակի առաջին համար Արմեն Ռուստամյանը։
«Այս մակարդակի վրա եթե մնա մեր գործը, հիասթափությունը շատ արագ լայն տարածում է ունենալու։ Մեր խնդիրն այն է, որ իրական հեղափոխությունը շարունակենք, դարձնենք լիարժեք, իսկ դա հիասթափություն չի առաջացնի մարդկանց մոտ, եթե բոլորի համար տեսանելի լինի, մտնի ամեն մեկի տուն։ Սրա համար պետք է հեղափոխությունն ունենա հստակ բովանդակություն, եւ այդ հստակ բովանդակությունն է, որ մենք ներկայացնում ենք հանրությանը»,– ասաց Արմեն Ռուստամյանը։
Նա շեշտեց, որ իրենց մոտեցումները բխում են ազգային, սոցիալիստական գաղափարներից։
Նշենք, որ բանավեճին մասնակցում են արտահերթ խորհրդարանական ընտրություններին մասնակցող 11 քաղաքական ուժերի բոլոր առաջին համարները։
