Մենք հույս ունենք, որ դատարանները կգործեն առանց հաշվի առնելու առկա բիրտ ճնշումները, թեեւ ոչինչ չենք բացառում: Այս մասին, այսօր՝ դեկտեմբերի 6-ին, լրագրողների հետ զրույցում նշեց երկրորդ նախագահ Ռոբերտ Քոչարյանի փաստաբանական խմբի անդամ Հայկ Ալումյանը՝ անդրադառնալով հարցին, թե ինչ է սպասում վերաքննիչ քրեական դատարանից, որը դեկտեմբերի 7-ին պետք է հրապարակի վճիռը Ռոբերտ Քոչարյանի մասով:
«Մենք պատրաստ ենք պայքարել, անմիջապես դիմել Եվրոպական դատարան, եթե ֆիքսենք մեր պաշտպանյալի իրավունքի խախտում: Ովքեր իրավաբանական ոլորտից քիչ թե շատ պատկերացում ունեն, հասկանում են, որ այս պայմաններում կայացված ցանկացած դատական որոշում, ինքը ի սկզբանե դատապարտված է համարվելու անօրինական»,-նշեց Ալումյանը:
Մինչ այդ նա հայտարարել էր, որ դեկտեմբերի 4-ին, երբ ավարտվեց Ռոբերտ Քոչարյանի վերաբերյալ դատավարությունը, նույն օրը վարչապետի պաշտոնակատար Նիկոլ Փաշինյանը Աշտարակում ելույթ ունենալով սպառնալիքներ հնչեցրեց դատական համակարգի վերաբերյալ:
