ԵՏՄ շրջանակներում գազի եւ նավթի միասնական շուկայի ձեւավորումը ԵՏՄ երկրների ՀՆԱ-ն տարեկան 9 մլրդ դոլարով կավելացնի: Եվրասիական Բարձրագույն տնտեսական խորհրդի նիստին այս մասին ասել է ՌԴ նախագահ Վլադիմիր Պուտինը:
Պուտինի խոսքով, երկրների միջեւ համագործակցությունը դինամիկ եւ արդյունավետ է ընթանում: Այս տարի ԵՏՄ երկրների ընդհանուր ՀՆԱ-ն աճել է 2 տոկոսով: Կազմակերպությունը բարելավել է իր դիրքերը միջազգային վարկանիշներում:
«Նիստին պատրաստվել են գազի եւ նավթի միասնական շուկայի ձեւավորման մասին նախագծեր: Սա ՀՆԱ-ն տարեկան 9 մլրդ դոլարով կավելացնի», -հավելել է ՌԴ նախագահը: Այս խնդիրն ըստ Պուտինի, վերջնականապես կլուծվի 2025-ին: Իսկ գազի ընդհանուր սակագների սահմանման համար, ըստ նրա, ժամանակ է պետք:
Նա նշեց, որ ինտենսիվ զարգանում է նաեւ արտադրական համագործակցությունը, մետալուրգիայի, արդյունաբերության ոլորտում փոխգործակցությունը: Նորարարությունների բարձր մասնաբաժնով ապրանքների արտահանումը կայուն աճում է:
Նա նաեւ առաջարկել է մշակել ԵՏՄ-ում ընդհանուր հաշվարկային ենթակառուցվածք՝ ժամանակակից ֆինանսական տեխնոլոգիաների օգտագործմամբ: Նա վստահ է, որ դա թույլ կտա բարձրացնել ազգային վճարային համակարգերի կայունությունը՝ դրանք դարձնելով դոլարից եւ այլ արտարժույթներից ավելի քիչ կախված:
«Սա ուղիղ իմաստով տնտեսական ինքնիշխանության բարձրացում է», -վստահ է Պուտինը: