Ֆրանսիայում բենզինի գների բարձրացման դեմ բողոքի ցույցերի եւ ոստիկանության հետ ցուցարարների բախումների ընթացքում երկրում ընդհանուր ձերբակալվել է 1385 մարդ, հայտարարել է Ֆրանսիայի ՆԳ նախարար Քրիսթոֆ Կաստաները, հայտնում է BFMTV-ն:
Նրա խոսքով՝ առավել մեծ թվով ցուցարարներ են ձերբակալվել Փարիզում՝ մոտ 1150 մարդ: Կաստաները նշել է, որ նրանց թվում մոտ 20-ը ինչպես ուլտրաձախ, այնպես էլ ուլտրաաջ շարժումների ներկայացուցիչներ են, որոնք համացանցում բռնության կոչեր են արել, եւ հիմա կալանավորված են: Ֆրանսիացի նախարարը չի բացառել ձերբակալվողների թվի աճը:
Շատերի մոտից առգրավվել են հանրահավաքների համար արգելված առարկաներ՝ մուրճեր, դիմակներ, պարսատիկներ եւ այլն:
Ավելի վաղ հաղորդվել էր, որ դեկտեմբերի 8-ին ցույցի ընթացքում ոստիկաններն ամբողջ երկրում 700 մարդու են ձերբակալել, Փարիզում, մասնավորապես, 575 մարդու: Ֆրանսիայում ցույցերին մասնակցողների թիվը գնահատվել է 125 հազար, որոնց դեմ իշխանությունները ներգրավել են 90 հազար ոստիկանի:
Ֆրանսիայում վառելանյութի հարկի բարձրացման դեմ բողոքի ցույցերը շարունակվում են նոյեմբերի կեսից: Ֆրանսիայի իշխանությունները զիջումների են գնացել եւ վառելանյութի գների բարձրացման մորատորիում ընդունել, բայց ցուցարարները պահանջում են երկրի նախագահ Էմանուել Մակրոնի հրաժարականը:
