Ուկրաինայի իշխանությունները հայկական ծագումով ռուս գործարարներ Սերգեյ եւ Նիկոլայ Սարկիսովներին կասկածում են առանձնապես խոշոր չափերի խարդախության մեջ։

Ուկրաինայի ազգային ոստիկանությունը նրանց նկատմամբ հետախուզում է հայտարարել։ Համապատասխան տեղեկատվությունը տեղադրված է ՆԳՆ կայքի հետախուզման մեջ գտնվողների բաժնում՝ հայտնում է Korrespondent.net.-ը։

Նշվում է, որ Սարկիսովները ընթացիկ տարվա սեպտեմբերի 24-ից թաքնվում են Ուկրաինայի նախաքննական մարմիններից։ Խափանման միջոց նրանց հանդեպ չի ընտրվել։

59-ամյա Սերգեյ Սարկիսովը Ռուսաստանի քաղաքացի է, գործարար, կինոպրոդյուսեր եւ կինոռեժիսոր։ Նա նաեւ «РЕСО-գարանտիա» ապահովագրական ընկերության հիմնական սեփականատերերից մեկն ու տնօրենների խորհրդի նախագահն է, ինչպես նաեւ՝ Ապահովագրողների համառուսական միության փոխնախագահը։

2007թ․ Սերգեյ Սարկիսովը «РЕСО-գարանտիա»-ի բաժնետոմսերի 33 տոկոսը վաճառել է ֆրանսիական АХА ապահովագրական խմբին։

Նրա կրտսեր եղբայրը՝ 50-ամյա Նիկոլայ Սարկիսովը, նույնպես «РЕСО-գարանտիա»-ի ղեկավարներից է։