Մեղրիի ազատ տնտեսական գոտին բավականին հեռանկարային ուղղություն է: Դեկտեմբերի 18-ին Հայաստանում Ռուսաստանի արտակարգ եւ լիազոր դեսպանի հետ համատեղ մամուլի ասուլիսում ասաց Հայաստանում ՌԴ առեւտրային ներկայացուցիչ Անդրեյ Բաբկոն:
Նրա խոսքով՝ սպասվում է դրան ռուսաստանցի ռեզիդենտների մասնակցությունը, սակայն ամեն ինչ կախված է Հայաստանի եւ Իրանի միջեւ պայմանավորվածություններից: «Ռուսաստանցի ներդրողները պատրաստ են մասնակցելու «Մեղրի» ազատ տնտեսական գոտու աշխատանքին, սակայն գործարարները պետք է հստակ իմանան, թե այս գոտում ինչ ապրանքներ է հնարավոր իրացնել»,- պարզաբանեց առեւտրային ներկայացուցիչը:
Բաբկոն նշեց, որ ռուսական հնարավորությունները կախված են Հայաստանի կառավարության ճիշտ ձեւակերպած խնդիրներից:
«Մենք Հայաստանի նոր կառավարության հետ աշխատելու հույս ունենք: Ներդրողների շրջանում առկա է սպասման ռեժիմ»,- հավելեց նա:
Տնտեսական ոլորտում հայ-ռուսական համագործակցության հիմնական ուղղություններին անդրադառնալով՝ ռուսաստանցի պաշտոնյան նշեց տրանսպորտային նախագծերը եւ սրա հետ կապված հիշեցրեց, որ շրջափակումը, որի մեջ է գտնվում Հայաստանը, կարտացոլվի համագործակցության վրա, քանի որ գոյություն ունի միայն «Վերին Լարս» հսկիչ անցակետով ավտոճանապարհը:
«Դրա աշխատանքում խափանումները կապված են բնական աղետների եւ բեռնափոխադրումների հոսքի հագեցվածության հետ: Խնդրի լուծման տարբերակներից մեկն է երկաթուղու դերի մեծացումը: Հարավկովկասյան երկաթուղին այս նպատակով միջոցներ է ձեռնարկում, մասնավորապես՝ լաստանավեր է վարձում եւ գնում, որոնք կարող են բեռները ծովային ճանապարհով Ռուսաստան հասցնել եւ հետ՝ Հայաստան»,- շեշտեց Անդրեյ Բաբկոն:
Նրա կարծիքով՝ Իրան-Հայաստան երկաթուղու կառուցումը նույնպես կնպաստեր տրանսպորտային խնդիրների լուծմանը եւ հանրապետությանը թույլ կտար տարանցիկ հաբ դառնալ:
«Առավել եւս, որ Հայաստանը ներկայանում է որպես ԵՏՄ միակ երկիր, որն Իրանի հետ ցամաքային սահման ունի: Սակայն հարցը բախվում է ներդրումներին»,- եզրափակեց Բաբկոն:
