Բյուրականի աստղադիտարանի աշխատակիցների միջին աշխատավարձն ավելի ցածր է, քան երկրի միջին աշխատավարձն է: Այս մասին այսօր լրագրողների հետ հանդիպման ժամանակ ասել է Բյուրականի աստղադիտարանի տնօրեն Արեգ Միքայելյանը` պատասխանելով NEWS.am-ի թղթակցի հարցին:
Ըստ նրա, գիտաշխատողի միջին աշխատավարձը կազմում է 118 հազար դրամ, իսկ աշխատակիցների միջին աշխատավարձը` 104 հազար դրամ: «Սակայն պետք է հաշվի առնել, որ ակտիվ գիտնականները կարող են կրկնապատկել եւ նույնիսկ եռապատկել իրենց աշխատավարձերը՝ մասնակցելով միջազգային մրցույթներին՝ պետական պարգեւներ ստանալով»,- միաժամանակ նկատել է նա:
Միքայելյանը նշել է, որ, ընդհանուր առմամբ, աստղադիտարանի բյուջեն չի ավելացել` ընդամենը 210 միլիոն դրամից մի փոքր ավելի չափով, ինչպես նաեւ ընդհանրապես գիտության ֆինանսավորումը:
«Պետության վերաբերմունքը գիտությանը արտահայտվում է բյուջեի ֆինանսավորմամբ: Այսօր գիտության ֆինանսավորումը պետության ողջ բյուջեի ընդամենը 0.25 տոկոսն է կազմում, եւ սա ամենավատ ցուցանիշներից մեկն է աշխարհում: Աշխարհում պետության կողմից գիտության ֆինանսավորման մասնաբաժինը կազմում է մոտ 2%», - ընդգծել է աստղադիտարանի տնօրենը:
Միեւնույն ժամանակ, Արեգ Միքայելյանը հավաստիացրել է, որ չնայած ֆինանսական դժվարություններին՝ դեռեւս հաջողվում է պահպանել աշխարհում հայկական աստղագիտության բարձր մակարդակը: «Վերջին տարիներին ֆինանսավորման ուղղությունը փոխվել է: Այսօր ավելի շատ ուշադրություն է հատկացվում անմիջապես գիտությանը, ինչն ապացուցում է այն փաստը, որ աստղադիտարանին հատկացված բյուջեի 65% -ն ուղղված է գիտության զարգացմանը», - եզրափակել է նա: